"Abituriyentlərə və valideynlərə tövsiyə edirəm ki, ilk növbədə hal-hazırda topladığı balla ehtimal olaraq düşə biləcək ixtisasların siyahısını çıxarsınlar və o siyahıdan abituriyentlərin qabiliyyətinə, bacarığına, maraq dairəsinə uyğun gələnləri ilk əvvəl yazsınlar".

Bu fikirləri "Tehsil365"ə açıqlamasında psixoloq Azər Qurbanov deyib.

O bildirib ki, əsas yanaşma maraq dairəsinə uyğun peşənin gələcəkdə lazım olub-olmadığı ilə bağlı mütəxəssislərdən məlumat almaq lazımdır:

"Elə peşələr var ki, gələcəkdə daha vacib olacaq, bəziləri isə yavaş-yavaş əvvəlki vacibliyini itiəcək.

Bir psixoloq olaraq bildirmək istəyirəm ki, əsas seçdiyin peşə deyil, onu mükəmməl öyrənməkdir. Valideynlər də öz tövsiyələrini verib son seçimi övladlarına buraxmalıdırlar. Özləri seçsin ki, gələcəkdə deyə bilsinlər ki, özüm seçdim. Əks halda həmişə beyinlərində qalacaq ki, valideynlərim seçdi və bu onlarıın cəmiyyətdə yer tutmalarına çətinlik yaradacaq".