Məlum olduğu kimi, dövlət ümumi təhsil müəssisələrinə müəllimlərin işə qəbulu üzrə müsabiqənin müsahibə mərhələsinin nəticələri barədə məlumat namizədlərin şəxsi səhifələrinə göndərilib.
"Tehsil365"in məlumatına görə, 14-22 avqust tarixlərində təşkil olunan müsahibələrdə 4658 nəfər uğur qazanıb.
Sosial şəbəkədə bir çox namizdələr hicablı şəxslərin qərəzli formada müsahibədən kəsildiklərini iddia edirlər. Onların sözlərinə görə, müsahibə mərhələsində uğurla çıxış edilsə də, hicablı olduqları üçün mərhələ adlaya bilməyiblər.
Məsələ ilə bağlı İnsan Resursları Mərkəzi ilə əlaqə saxladıq. Mərkəzdən "Tehsil365"ə bildirildi ki, müsahibələr zamanı müvafiq komissiyalar tərəfindən namizədlərin peşəkar kompetensiyaları, psixoloji hazırlığı və ümumi dünyagörüşü proqrama uyğun olaraq yoxlanılır və uyğun olmayan şəxslər də uğur qazanmır.
"Fərqli hansısa meyar yoxdur", - deyə qurumun cavabında qeyd olunub.
Xatırladaq ki, müsahibə mərhələsində uğur qazanmayan namizədlər 27 avqust saat 18:00-dan etibarən şəxsi səhifələrinə daxil olaraq apellyasiyaya müraciət edə bilərlər. Apellyasiya müraciətlərinin qəbulu 28 avqust saat 18:00-da başa çatacaq.