Ali təhsil müəssisələrində boş plan yerlərinə qəbulun nəticələri açıqlanıb. Artıq sentyabrın 9-dan etibarən tələbə adını qazanmış hər bir şəxs portaldan qeydiyyatdan keçə bilər.
Tehsil365 xəbər verir ki, 2024/2025-ci tədris ili üçün xüsusi və mülki təyinatlı ali təhsil müəssisələri (XTATM) üzrə 62038 plan yeri ayrılıb. Onlardan 2425 plan yeri XTATM və digər istiqamətlər üzrə, 59613 plan yeri isə mülki təyinatlı ali təhsil müəssisələri üzrədir.
I ixtisas qrupu üzrə ümumilikdə 19 min 990, II ixtisas qrupu üzrə 14 min 550, III ixtisas qrupunda 15 min 459, IV 4600 və nəhayət V ixtisas qrupu 5014 plan yeri ayrılıb.
Ali məktəblərə qəbulun I mərhələsinin nəticələrinə əsasən I ixtisas qrupu üzrə 1304, II ixtisas qrupu üzrə 246, III ixtisas qrupu üzrə 400, IV ixtisas qrupu üzrə 463, V ixtisas qrupu üzrə isə 348 plan yeri boş qalıb.
Qəbulun II turunda isə boş qalan plan yerlərinə ixtisas seçimi aparılıb. Seçimin nəticələrinə əsasən 528 nəfər ali məktəbə qəbul olunub.
Beləliklə, ali təhsil müəssisələrində I mərhələdən qalmış 2761 plan yerinin 528-i ikinci mərhələdə dolub. Nəticədə Universitetlərdə 2233 plan yeri boş qalıb.