Oktyabrın 16-da Azərbaycanın Odlar Yurdu Universiteti və Özbəkistanın Fərqanə Dövlət Universitetinin birgə təşkilatçılığı ilə “Özbəkistan tarixinə və mədəniyyətinə səyahət” adlı tədbir keçirilib.
Tehsil365 xəbər verir ki, tədbir iştirakçıları və qonaqlar universitetin foyesində Ümummilli Lider Heydər Əliyevin büstünün önünə gül dəstələri qoyublar. Sonra özbəkistanlı tələbələrin əl işlərindən ibarət sərgi nümayiş olunub.
Tədbirdə Azərbaycan və Özbəkistanın Dövlət himnləri səsləndirilib, Vətən müharibəsi şəhidlərinin əziz xatirəsi bir dəqiqəlik sükutla yad edilib.
Odlar Yurdu Universitetinin rektoru Əhməd Vəliyev bildirib ki, Azərbaycanla Özbəkistan arasında tarixən sıx mədəni əlaqələr mövcud olub. Hər iki xalq bir-birinin mədəniyyətindən bəhrələnib, bir-birinin mədəniyyətinə və onun inkişafına özünəməxsus təsir göstərib. Hər iki ölkə liderlərinin qarşılıqlı səfərləri türk dövlətləri arasında əlaqələrin və strateji tərəfdaşlığın inkişaf etdirilməsi baxımından mühüm tarixi hadisədir.
“Bu gün Azərbaycan müxtəlif beynəlxalq tədbirlərin keçirildiyi məkana çevrilib. Bu baxımdan COP29-un Azərbaycanda keçirilməsi ölkəmizin nüfuzu üçün olduqca əhəmiyyətlidir. Özbəkistandan gəlmiş nümayəndə heyətinin bu tədbirdə iştirakını yüksək qiymətləndirirəm”, - deyə rektor vurğulayıb.
Tədbirdə Fərqanə Dövlət Universitetinin rektoru Bahodirjon Şermuhammedov, Özbəkistan Respublikasının Azərbaycandakı səfiri Bahrom Aşrafxanov iki ölkənin dostluq, mədəni əlaqələrini yüksək qiymətləndiriblər. Qeyd ediblər ki, kökləri eyni olan iki qardaş ölkənin tarixi və mədəniyyəti qədim dövrlərə gedib çıxır və Özbəkistanla Azərbaycan arasında əlaqələr xüsusilə son illərdə durmadan genişlənir.
Rektor Əhməd Vəliyev tərəfindən səfir Bahrom Aşrafxanova Odlar Yurdu Universitetinin “Fəxri qonağı” diplomu təqdim edilib. Fərqanə Dövlət Universitetinin rektoru Bahodirjon Şermuhammedov isə “Fəxri professor” adına layiq görülüb.
Odlar Yurdu Universiteti ilə Fərqanə Dövlət Universiteti arasında elm və təhsil sahəsində ikitərəfli protokol imzalanıb.
Tədbirdə Özbəkistanın mədəni, tarixi və mənəvi zənginlikləri və UNESCO-nun Özbəkistan Respublikasındakı tarixi miraslarına aid videoçarx nümayiş olunub.
Tədbir bədii hissə ilə davam edib.
