ADA Universitetinin tarixinə nəzər salsaq görərik ki, universitetə çevrilməyimizin səbəblərindən biri məhz IT məktəbi olub. IT məktəbi və mühəndislik məktəbi Azərbaycan Diplomatik Akademiyasına qoşuldu və biz o vaxtdan universitetə çevrildik.
Tehsil365 xəbər verir ki, bunu ADA Universitetinin prorektoru, Milli Məclisin deputatı Fariz İsmayılzadə oktyabrın 17-də Bakıda keçirilən Süni İntellekt və Data Elmləri üzrə Birinci Avrasiya Forumunda çıxışı zamanı söyləyib.
“Bizim üçün IT texnologiyaları, kompüter elmləri, kompüter mühəndisliyi mövzusu çox önəmlidir. Biz buna çox diqqət yetiririk. Çünki biz sənaye ilə işləyirik. Şirkətləri əməkdaşlığa dəvət edirik. Araşdırma aparırıq. Bu forumda İsraildən, Portuqaliyadan, Koreyadan, ABŞ-dan, Rusiyadan və digər ölkələrdən məruzəçilərin iştirak etdiyini görməkdən çox şadam. Bu, ötən həftə Bakıda keçirilmiş “InMerge” Sammiti qədər böyük olmayan kiçik bir konfransdır. Düşünürəm ki, “InMerge” Sammitində 5000-dən çox iştirakçı var idi. Burada hər şeyi daha kiçik miqyasda götürürük. Amma hesab edirik ki, bu konfranslar tələbələr üçün vacibdir. Belə tədbirlər tədqiqatçılar, sənaye üçün vacibdir. Düşünürəm ki, yavaş-yavaş Azərbaycanda hamının iştirak etdiyi, hər kəsin töhfə verəcəyi ekosistem yaradacağıq. Biz birlikdə Azərbaycanda iqtisadiyyatın inkişafına töhfə verə bilərik”, - deyə Fariz İsmayılzadə bildirib.