Bizə ən çox mane olan Sovet dövründən miras qalmış uşaq bağçası modelidir.
Tehsil365 xəbər verir ki, bu sözləri Elm və təhsil naziri Emin Əmrullayev "Məktəbəqədər təhsildə keyfiyyətə yeni baxış" II Beynəlxalq Konfransda çıxışı zamanı bildirib.
Nazir qeyd edib ki, artıq 1-ci sinfə gələn uşaqlar bir il daha tez oxumağa başlayacaqlar:
"Yəni, uşaqlar öz yaşıdlarından daha tez oxuma səriştələrinə sahib olacaqlar. Biz bunun müsbət nəticələrini görəcəyik. Ən böyük maneə Sovet dövründən miras qalmış uşaq bağçası modelidir. Bu model qayğıya yönəlmiş bir modeldir və kifayət qədər xərc tələb edirdi. Bir uşağa düşən vəsaiti bütün uşaqların sayına vuranda böyük məbləğ ortaya çıxır. Dünyanın heç bir ölkəsində bizim kimi bağçada uşağın gündə 4 dəfə qidalanması modeli yoxdur.
2017-2018-ci illərdə yaradılmış İcma əsaslı Məktəbəqədər Təhsil modeli, xüsusən də bağça olmayan yerlərdə daha uğurlu tətbiq olunacaq. Bu model əvvəlki modeldən daha sərfəlidir. Hər il 20 min uşaq bu üsul vasitəsilə təhsilə cəlb olunur. Şəhər yerlərində bunu həyata keçirmək çətindir, çünki Abşeron və Xırdalan qəsəbələrində sıxlıq mövcuddur. Ancaq növbəti yeni yanaşmamız, bu ərazilərdə dövlət-özəl tərəfdaşlıq modelinin tətbiqi olacaq. Yəni, müəyyən hissəsini dövlət, digər hissəsini isə valideynlər ödəniş edəcəklər".