Bu gün Bakıda “Məktəbəqədər təhsildə keyfiyyətə yeni baxış” adlı II beynəlxalq konfrans baş tutub.
Tehsil365 xəbər verir ki, Elm və Təhsil Nazirliyi, Təhsildə Keyfiyyət Təminatı Agentliyinin təşkilatçılığı, Məktəbəqədər və Ümumi Təhsil üzrə Dövlət Agentliyi, Təhsil İnstitutunun tərəfdaşlığı ilə baş tutan konfransın təşkilində əsas məqsəd məktəbəqədər təhsildə keyfiyyətin daha da yüksəldilməsinə nail olmaq və qabaqcıl təcrübələrlə tanışlıq olub.
Konfransda Elm və təhsil naziri Emin Əmrullayev, Təhsildə Keyfiyyət Təminatı Agentliyinin İdarə Heyətinin sədri Tural Əhmədov və digər şəxslər iştirak ediblər.
Beynəlxalq konfransa yerli mütəxəssislərlə yanaşı Böyük Britaniya, Estoniya və Finlandiyadan ekspertlər qatılıblar.
Tural Əhmədov deyib ki, məktəbəqədər təhsilə 1-5 yaşı əhatə edən uşaqların cəlb olunması nəzərdə tutulub: "Erkən yaş dövrü ilk 3 il ən önəmli dövrü əhatə edir. Bu da uşaqların növbəti təhsil pillələrində daha uğurlu olmalarına təsir edəcək".
O əlavə edib ki, cari ildə müxtəlif şəhər və rayonlarda 100 məktəbəqədər təhsil müəssisəsində keyfiyyət monitorinqləri aparılıb. 2023-cü ildə isə 50 müəssisə üzərində belə monitorinq aparılıb.
Elm və təhsil naziri Emin Əmrullayev çıxışı zamanı deyib ki, məktəbəqədər təhsil təhsilin ən vacib pillələrindəndir: "Hazırda 1-5 yaş arasındakı uşaqların ən azı 50 faizinin məktəbəqədər təhsilə cəlb olunması əsas hədəflərimizdəndir".
O qeyd edib ki, hazırda 1-5 yaş arasında uşaqların 10-15 faizi məktəbəqədər təhsilə cəlb olunub: "Elm və Təhsil Nazirliyinin həyata keçirdiyi ən böyük islahatlardan biri 5 yaşlı uşaqların məktəbəqədər təhsilə cəlb olunmasıdır. Bu gün Azərbaycanda hər 10 uşaqdan 8, 9-u məktəbəqədər hazırlığa gedir. Bu prosesin müsbət nəticələrini yaxın 10-15 ildə görəcəyik".
Qeyd edək ki, konfrans iki paneldən ibarət olub.