Təhsilin fasiləsizliyi “Təhsil haqqında” qanunda var. Ona görə layihədə doktoranturanı da nəzərə almışıq. Doktranturada təhsil alanlara heç yaş məhdudiyyəti də tətbiq etməmişik.
Tehsil365 xəbər verir ki, bunu Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında Səfərbərlik və Hərbi Xidmətə Çağırış üzrə Dövlət Xidmətinin Həqiqi hərbi xidmətə çağırış baş idarəsinin rəisi Azər Babayev deyib.
O bildirib ki, gənclərin elmli, təhsilli olmasını çox istəyir: “Bizim bazada son statistikaya əsasən, ümumi möhlət verilənlərdən 60 %-i Türkiyədə, 11,8%-i Rusiyada, 6,8%-i Polşada, 6%-i Ukraynada, 2,6%-i Almaniyada, 2%-i Gürcüstanda, 1,6%-i ABŞ-da, 1,3%-i Böyük Britaniyada təhsil almağa gedir. Digər ölkələrin ali məktəbləri ilə bağlı bu göstərici 1 %-dən aşağıdır. İki ilin statistikasına görə, Kütahya Dumlupınar Üniversitesi təhsilə görə gətirilən arayışların sayına görə 1-ci yerdə olub. 2023-cü ildə isə 1-ci yerdə Gümüşhanə Universiteti qərarlaşıb. Mən də çox istəyərdim ki, yaxşı universitetlərdə oxusunlar, amma statistika belədir. Yaxşı universitetlərə təhsil alma]a gedənlərin sayı çox azdır”.