16 dekabr saat 11:00-dan etibarən respublika fənn olimpiadalarında iştirak üçün qeydiyyatdan keçmiş şagirdlər //portal.edu.az/ platforması üzərindən “Müsabiqə və olimpiadalar” bölməsinə daxil olaraq buraxılış vərəqələrini yükləyə və çap edə bilərlər.
Bu barədə “Tehsil365”ə Təhsil İnstitutundan məlumat verilib. Bildirilib ki, informatika fənnindən qeydiyyatdan keçən şagirdlərə imtahanda iştirakla bağlı yaxın günlərdə məlumat göndəriləcək.
Fizika və kimya fənni üzrə imtahanda iştirak edən şagirdlərə kalkulyatordan istifadə etmək imkanı yaradılacaq.
Respublika fənn olimpiadalarının rayon (şəhər) mərhələsi informatika fənni üzrə VIII-IX siniflər üçün 28 dekabrda, X-XI siniflər üçün 29 dekabrda, digər fənlər üzrə isə 22 dekabrda keçiriləcək.
Buraxılış vərəqələrinin şəxsi kabinet vasitəsilə əldə edilməsi zamanı yaranan hər hansı çətinliklə əlaqədar şagirdin təhsil aldığı ümumtəhsil müəssisəsinə müraciət edə bilərsiniz.
Fənn olimpiadalarının keçirilməsində əsas məqsəd şagirdlərdə keyfiyyətli təhsil alma, biliklərə marağı artırmaq və özünəinam hisslərini gücləndirmək, ayrı-ayrı fənlər üzrə istedadı və yaradıcı təfəkkürü ilə fərqlənənləri aşkar etməklə onların potensial imkanlarının inkişafını təşkil etmək istiqamətində tədbirlər müəyyənləşdirmək, şagirdlərin ixtisas və peşə seçiminə hazırlanması üçün zəmin yaratmaqdan ibarətdir.
Qeyd edək ki, fənn olimpiadaları “Kapital Bank”ın baş sponsorluğu ilə təşkil edilir.