Yaponiyada süni cazibə qüvvəsi olan kompleks layihəsi təqdim olunub.
Tehsil365 xəbər verir ki, Kioto Universitetinin bir qrup alimi Kajima tikinti korporasiyasının mütəxəssisləri ilə birlikdə Ayda yaşayış kompleksi üçün “The Lunar Glass” adlı qabaqcıl layihə təqdim ediblər. Layihənin əsas məqsədi gələcək kosmik məskunlaşmalar üçün şərait hazırlamaq, həmçinin kosmosda uzun müddət qalma zamanı mikroqravitasiyanın insan orqanizminə mənfi təsirini minimuma endirməkdir.
Tərtibatçıların fikrincə, “The Lunar Glass” şüşə günbəz formasında hazırlanmış və nəhəng dairəvi platformada quraşdırılmış fırlanan konstruksiya olacaq. Hündürlüyü 400 metr, diametri isə 200 metrə çatacaq. Ayın səthində yaşamaq və işləmək üçün rahat şərait yaradan kompleksdə 10 min nəfərə qədər insanın yerləşdirilə biləcəyi gözlənilir.
Planlara əsasən, gələn ildən layihə üzərində hazırlıq işləri başlanacaq. Çalışmalara həm texniki hesablamalar, həm də materialların Aya çatdırılması üçün maddi-texniki hazırlıq işləri daxildir. Obyektin tam istifadəyə verilməsi 2030-cu illərin əvvəllərində gözlənilir.
Mütəxəssislər əmindirlər ki, belə yaşayış komplekslərinin yaradılması kosmosun tədqiqi və Yerdən kənarda daimi insan koloniyalarının inkişafı istiqamətində mühüm addım olacaq. “The Lunar Glass” süni cazibə qüvvəsi sayəsində uzun müddət çəkisizliyə məruz qalma zamanı kosmonavtların sağlamlığı ilə bağlı problemləri həll edə biləcək.
Beləliklə, layihə təkcə Ayın tədqiqi üçün yeni üfüqlər açmayacaq, həm də bəşəriyyətin kosmosda həyat haqqında təsəvvürlərini dəyişdirə biləcək gələcək texnologiyaların inkişafında mühüm mərhələ olacaq.