Bir neçə gün sonra il başa çatır. 2024-cü il təhsil həyatında bir çox yeniliklərlə, uğurlarla yadda qaldı. Bu il olimpiyada qalibləri, yeni ixtisaslar, universitetlər, xaricdə təhsil alan tələbələrin sayının artması və bir çox müsbət hadisələrlə yadda qaldı.
Bu barədə “Tehsil365”ə Məktəbəqədər və Ümumi Təhsil üzrə Dövlət Agentliyindən məlumat verilib.
Bildirilib ki, 2023-2024-cü tədris ilində respublika fənn olimpiadalarına 55 000-dən çox şagird qatılıb:
“Respublika fənn olimpiadaları ümumi təhsil müəssisələrnin 8-11-ci sinifləri arasında ayrı-ayrı fənlər üzrə xüsusi istedada malik şagirdlərin aşkarlanması, onların bilik və bacarıqlarının qiymətləndirilməsi, məktəblilərin həmin fənlərə olan marağının artırılması məqsədilə hər il keçirilən, ölkənin bütün şəhər və rayonlarını əhatə edən elm yarışıdır.
Şagirdlər, valideynlər və təhsil ictimaiyyəti tərəfindən fənn olimpiadalarına maraq ildən-ilə artmaqdadır. Qeyd edirik ki, 8 müxtəlif fənn üzrə təşkil olunan olimpiadanın nəticələrinə əsasən 85 nəfər qızıl, 162 nəfər gümüş, 244 nəfər bürünc olmaqla, ümumilikdə 491 nəfər qalib elan edilib”.