Dövlət İmtahan Mərkəzi (DİM) magistratura səviyyəsinə qəbul imtahanı üçün bakalavrların qeydiyyatının 2025-ci ilin yanvar-fevral aylarında keçiriləcəyini açıqlayıb.
Bu barədə "Təhsil365"in sorğusuna cavab olaraq DİM-dən məlumat verilib. Bildirilib ki, bakalavrların diplomları ilə bağlı hər hansı problem yaşamamaları üçün indidən MyGov.az portalına daxil olaraq "Təhsil məlumatlarım" bölməsində məlumatlarını yoxlamaları tövsiyə olunur.
Əgər:
● Təhsil (diplom) haqqında məlumat sistemdə mövcud deyilsə,
● Yaxud məlumatlarda qeyri-dəqiqlik varsa,
Bakalavrlar bitirdikləri ali təhsil müəssisəsinə müraciət etməlidirlər. Əgər bu təhsil müəssisəsi fəaliyyət göstərmirsə, Elm və Təhsil Nazirliyinə müraciət etmək lazımdır.
Həmçinin xarici dövlətlərdə təhsil almış Azərbaycan vətəndaşları diplom məlumatlarını apply.enic.edu.az platformasında yoxlamalıdırlar. Əgər məlumat sistemdə aşkar olunmursa, Təhsildə Keyfiyyətin Təminatı Agentliyinə müraciət etmələri tövsiyə olunur.