Gəncə Dövlət Universitetində (GDU) 2024/2025-ci tədris ilinin payız semestrinin imtahan sessiyasına start verilib. Yanvarın 6-da başlayan imtahan sessiyasının 31 yanvar tarixində yekunlaşması nəzərdə tutulur.
Universitetdən AZƏRTAC-ın bölgə müxbirinə verilən məlumata görə, rektor Yusif Yusibovun imzaladığı əmrə əsasən, ali təhsil ocağında bütün texniki-təşkilati işlər yüksək səviyyədə başa çatdırılıb. İmtahan sessiyasının mövcud əsasnamələrə uyğun obyektiv keçirilməsi, imtahan prosesinə kənar müdaxilənin yol verilməməsi və tələbələrin biliklərini nümayiş etdirməsi üçün lazımi şərait yaradılıb. İmtahan cədvəlləri təsdiq edilib və hər bir fənn üzrə suallar vaxtında tələbələrə çatdırılıb. İmtahanla bağlı təlimat GDU-nun rəsmi saytında yerləşdirilib.
İmtahanların gedişinə operativ nəzarət və tələbələrin biliyinin qiymətləndirilməsində şəffaflığı təmin etmək məqsədilə GDU-da İmtahan Qərargahı və Apellyasiya Komissiyası təşkil olunub. Həmçinin imtahanlara ictimai nəzarətin həyata keçirilməsi məqsədilə elm xadimləri, deputatlar, ictimaiyyət və media nümayəndələri, eləcə də valideynlərdən ibarət İctimai Nəzarət Şurası yaradılıb.
İmtahanlar kameralarla təchiz olunmuş auditoriyalarda keçirilir və imtahan nəticələrinin həmin gün, müstəsna hallarda isə növbəti gün tələbələrə elan olunması nəzərdə tutulur.
Qeyd edək ki, payız semestrinin imtahan sessiyası yazılı, test, şifahi və yaradıcılıq tələb edən ixtisaslarda isə qabiliyyət formasında keçiriləcək.
Sessiya zamanı üzrlü səbəbdən imtahanda iştirak etməyən və akademik borcu yaranmış tələbələrə isə fevralın 13-14-də təkrar imtahan vermək imkanı yaradılacaq.
