Odlar Yurdu Universitetinin müəllimi vəfat edib.
Tehsil365 xəbər verir ki, bu barədə universitetin rəsmi hesabında paylaşım edilib.
Paylaşımı təqdim edirik.
Odlar Yurdu Universitetinin rəhbərliyi, professor-müəllim heyəti və tələbələri adından, uzun illər universitetimizin "İqtisadiyyat və iqtisadi münasibətlər" kafedrasının müdiri, daha sonra isə metodiki mərkəzin rəhbəri və professoru kimi fəaliyyət göstərmiş, elmin və təhsilin inkişafında misilsiz xidmətlər göstərmiş Ələkbərov Əziz Həmid oğlunun vəfatı ilə əlaqədar dərin hüzn hissimizi ifadə edirik.
Əziz Həmid oğlu Ələkbərov yalnız görkəmli alim və pedaqoq deyil, həm də yüksək insani dəyərləri, nəcib şəxsiyyəti və əsl ziyalı nümunəsi ilə həmkarlarının və tələbələrinin qəlbində silinməz iz buraxmışdır. O, Azərbaycan elminin inkişafında müstəsna rol oynamış, təhsilin müasir tələblərə uyğunlaşmasına və yeni yanaşmaların tətbiqinə xüsusi töhfələr vermişdir.
Əziz Həmid oğlu Ələkbərov yüzdən artıq elmi məqalə və tezisin, bir neçə monoqrafiya, 6 dərslik və çoxsaylı fənn proqramlarının müəllifi olaraq elmi-pedaqoji sahədə zəngin irs yaratmışdır. SSRİ İxtiralar və Kəşflər üzrə Dövlət Komitəsi tərəfindən qeydə alınmış 24, o cümlədən Rusiyada patentləşdirilmiş 8 ixtiranın müəllifi olan Əziz Həmid oğlu Ələkbərov, tədqiqatlarında nəzəri bilikləri praktik tətbiqlərlə birləşdirərək elmin müxtəlif sahələrində innovativ nailiyyətlər əldə etmişdir.
Onun əməyi, ziyalı şəxsiyyəti və təhsil sahəsinə verdiyi töhfələr həmişə hörmətlə və minnətdarlıqla xatırlanacaq, yaratdığı irs gələcək nəsillər üçün bir örnək olaraq qalacaqdır.
Bu ağır itki ilə əlaqədar mərhumun ailəsinə, yaxınlarına və doğmalarına dərin hüznlə başsağlığı verir, onlara səbir və təskinlik diləyirik.
Allah rəhmət eləsin!