"Magistratura pilləsinə qəbul prosesində ciddi dəyişikliklərə ehtiyac var"
Bu barədə "Təhsil365"ə açıqlamasında təhsil eksperti Ramin Nurəliyev deyib.
O bildirib ki, hazırkı qəbul prosesi xüsusilə humanitar fənlər üzrə bakalavr təhsili alan tələbələr üçün qeyri-adekvat görünür. "Bir coğrafiya, tarix və ya filologiya ixtisası məzunu magistraturaya qəbul olmaq üçün məntiqdən, informatikadan və xarici dildən imtahan vermək məcburiyyətindədir, lakin öz ixtisasına dair suallarla qarşılaşmır. Halbuki magistratura təhsilin akademik pilləsidir və tələbələrin ixtisas üzrə biliklərini dərinləşdirərək elmi sahədə irəliləməsinə xidmət etməlidir" – deyə o vurğulayıb.
Nurəliyev xüsusilə məntiq testlərinin tələbənin ixtisasına uyğun olaraq tərtib edilməsini təklif edir. "Türkiyədə magistratura qəbulunda ixtisas yönümlü məntiqi suallar salınır. Eyni təcrübəni Azərbaycanda da tətbiq etmək mümkündür. Məsələn, coğrafiya üzrə məntiqi suallar və ya Azərbaycan dilində dil məntiqinə aid suallar hazırlana bilər. Amma sırf riyazi məntiqdən 50 sual tələb etmək düzgün deyil".
Mövcud formatda magistratura qəbul imtahanı 100 ballıq qiymətləndirmə ilə həyata keçirilir:
50 sual məntiqdən,
25 sual informatikadan,
25 sual xarici dildən.
Bu sualların 20-si test üsulu, 5-i isə esse tiplidir. Nurəliyev əlavə edib ki, ixtisas üzrə sualların daxil edilməsi tələbələrin elmi biliklərinin daha obyektiv dəyərləndirilməsinə imkan yaradar.
"Müasir dövrdə informatika və xarici dil bilikləri mühüm əhəmiyyət kəsb etsə də, magistraturaya qəbulda ixtisas fənlərinə xüsusi yer ayrılmalıdır. Belə dəyişikliklər həm humanitar, həm də dəqiq fənlər üzrə təhsil alan tələbələr üçün daha ədalətli şərait yaradacaq" – deyə Nurəliyev fikrini yekunlaşdırıb.