Baş ağrısı ən geniş yayılmış problemlərdən biridir - bu, nevroloqa müraciət etmənin ən çox rast gəlinən səbəblərindən biridir. Uşaqlar da daxil olmaqla hər kəs vaxtaşırı bununla qarşılaşır. Eyni zamanda, başa düşmək vacibdir ki, bəzi hallarda bu vəziyyət uşaq üçün təhlükəli ola bilər.
Tehsil365 bu barədə Gazeta.ru-ya istinadən xəbər verir.
Rusiyalı uşaq nevroloqu Qalina Nevryuzina bildirib ki, ümumilikdə 300-dən çox müxtəlif başağrısı növü təsnif edilib:
"Əksər hallarda insanlar əvvəlcə analgetiklər və digər ağrıkəsicilərdən istifadə edərək bu problemin öhdəsindən özləri gəlməyə çalışırlar. Həkimə yalnız ağrılar davamlı olduqda və adi dərmanlar kömək etməyi dayandırdıqda müraciət edirlər".
Onun sözlərinə görə, ilk növbədə başağrısının növünü müəyyən etmək və onun yaranmasına səbəb olan əsas amilləri aşkar etmək lazımdır.
"Bir çox hallarda başağrısı əsas patoloji proses deyil, başqa xəstəliyi müşayiət edir və bəzən təhlükəli olan onun simptomu olur. Belə hallara orqanizmin ciddi intoksikasiyası (məsələn, virus xəstəlikləri və ya qida zəhərlənmələri zamanı), burun-udlağın iltihabi və infeksion xəstəlikləri, onurğanın boyun hissəsində baş beyinin qan təchizatının pozulması ilə müşayiət olunan problemlər, baş beyinin qabığının və maddəsinin infeksion zədələnmələri kimi simptomları aid etmək olar", - deyə Nevryuzina bildirib.
Bundan əlavə, o qeyd edib ki, baş ağrılarının tez-tez rast gəlinən səbəbi, xüsusilə yeniyetməlik dövründə vegetativ-damar distoniyasıdır.
Uşaqda təhlükəli vəziyyətin olduğunu və təcili hospitalizasiya tələb edildiyini göstərə bilən əlavə simptomlar bunlardır: başa zərbə kimi qəfil, son dərəcə güclü, dözülməz ağrının meydana çıxması, başağrısı tutmasından sonra huşun itməsi, qıcolmaların əmələ gəlməsi, şüurun dəyişməsi, ətraf mühitin qeyri-adekvat qəbul edilməsi, görmənin kəskin pisləşməsi, bədənin müxtəlif hissələrinin keyləşməsi, temperaturun 38 dərəcədən yuxarı qalxması, tutmaların və ya ağrı hislərinin intensivliyinin artması.
"Müasir müayinə üsulları hər bir konkret halda baş ağrılarının yaranmasının həqiqi səbəblərini müəyyən etməyə, onların müalicəsi üçün vaxtında tədbirlər görməyə, xəstəni tam həyata qaytarmağa kömək edir", - deyə mütəxəssis fikrini yekunlaşdırıb.