ARTİ-nin direktor səlahiyyətlərini icra edən Elnur Əliyevin iştirakı ilə ümumi təhsil müəssisələrində metodik xidmət göstərən metodistlərlə görüş keçirilib.
Təhsil İnstitutundan “Tehsil365”ə bildirilib ki, onlayn formatda keçirilən görüşdə metodik işin təşkili istiqamətində əldə edilən nəticələr, həyata keçirilməsi nəzərdə tutulan təkmilləşdirici tədbirlər və fəaliyyət istiqamətləri geniş şəkildə müzakirə edilib.
ARTİ-nin direktor səlahiyyətlərini icra edən Elnur Əliyev müasir metodik xidmətin təşkili ilə bağlı ölkədə aparılan islahatlar haqqında danışaraq metodistlərin gələcək fəaliyyətində baş verəcək yeniliklər barədə məlumat verib. E. Əliyev çıxışında həmçinin müasir metodik xidmətin təşkilinin ümumi təhsil müəssisələrində əhəmiyyətini vurğulayıb və metodistlərin təhsil sisteminin keyfiyyətinin yüksəldilməsində mühüm rol oynadığını qeyd edib. O, innovativ və müasir metodik yanaşmaların tədris prosesində effektivtivliyini, həmçinin metodistlərin peşəkar inkişafı üçün yeni təlim proqramlarının və beynəlxalq təcrübənin öyrənilməsinin vacibliyini vurğulayıb.
Daha sonra metodik işin təşkilinin səmərəliliyinin artırılması üçün metodistlərin fəaliyyətində qarşıya çıxan problemlər, onların həlli yolları, fəaliyyətin daha səmərəli şəkildə qurulması üçün görülməli olan işlər müzakirə edilib.
Görüşdə Təhsil İşçilərinin Peşəkar İnkişaf Mərkəzinin direktoru Nəzakət Mehdiyeva, eləcə də Metodik Dəstək Mərkəzinin idarəetmə heyəti və əməkdaşları iştirak ediblər.
Nəzakət Mehdiyeva metodistlik fəaliyyətinin müəllimlərin peşəkar inkişafına olan müsbət tərəflərini qeyd edib və metodistlərin özlərinin inkişafına daha çox diqqət yetirməli olduğunu bildirib.