Azərbaycan Turizm və Menecment Universitetində (ATMU) “Synergia Academy”nin İdarə Heyətinin üzvləri ilə növbəti görüş keçirilib.
Bu barədə “Tehsil365”ə ATMU-dan məlumat verilib.
ATMU-nun rektoru İlham Mədətov bildirib ki, universitet istər tələbə, istərsə də professor-müəllim heyəti üçün səmərəli əməkdaşlıqlara hər zaman üstünlük verib, yeniliklərə hazır olub. Daha sonra tərəflər universitetin tələbələrinin və məzunlarının peşəkar inkişafını dəstəkləmək məqsədilə bir sıra önəmli məsələləri gündəmə gətiriblər. Onların daha uğurlu karyera qurması üçün təlimlərin təşkili, həmçinin sənaye müəssisələri ilə universitet arasında əlaqələrin yaradılması məsələləri geniş müzakirə olunub.
Təklif olunan əməkdaşlıq çərçivəsində tələbələrin əmək bazarına hazırlığını gücləndirəcək və onların peşəkar bacarıqlarını artıracaq birgə layihələrin həyata keçirilməsi ilə bağlı fikir mübadiləsi aparılıb.
Görüşün sonunda ATMU ilə “Synergia Academy” arasında əməkdaşlığa dair memorandum imzalanıb. Əməkdaşlıq çərçivəsində universitetin tədris və peşəkar inkişaf sahəsindəki fəaliyyətinin daha da gücləndiriləcəyi, tələbələr üçün yeni perspektivlər yaradılacağı planlaşdırılır.
