"Regional İnkişaf" İctimai Birliyi (RİİB) Azad Mirzəcanzadə İnkişaf Proqramının növbəti mərhələsinə müraciətlərin qəbuluna başlayıb. Proqram, görkəmli alim Azad Mirzəcanzadənin tədris üslubu və yaradıcı yanaşmalarından ilhamlanaraq, istedadlı gəncləri üzə çıxarmağı və onların inkişafını dəstəkləməyi hədəfləyir.
"Tehsil365" xəbər verir ki, proqram çərçivəsində seçilən ən yaxşı layihə müəlliflərinə 5000 manatadək maliyyə dəstəyi təqdim olunacaq. İştirakçılar eyni zamanda peşəkar təlimlərdə iştirak edəcək, layihələrin hazırlanması və təqdimatı üzrə biliklərini artıracaq, həmçinin liderlik bacarıqlarını inkişaf etdirmək üçün müxtəlif fəaliyyətlərdə yer alacaqlar.
Kimlər müraciət edə bilər?
Proqrama 18-35 yaş arasında olan hər bir Azərbaycan vətəndaşı müraciət edə bilər. Təqdim olunan layihələr sosial, ekoloji, maarifləndirici, innovativ və sahibkarlıq kimi müxtəlif istiqamətləri əhatə edə bilər.
Qeyd edək ki, proqram 2023-cü ilin sentyabr ayında elan edilib və ilk altı qalib artıq layihələrini uğurla tamamlayıb. Onların sosial, ekoloji və innovativ təşəbbüsləri proqramın yenilikçi yanaşmaları dəstəklədiyini və cəmiyyətə real təsir göstərdiyini sübut edir.
Müraciət qaydaları
Proqrama müraciət etmək istəyənlər 28 fevral 2025-ci il tarixinədək bu linkə daxil olaraq qeydiyyatdan keçə bilərlər.
Əlavə məlumat üçün "Regional İnkişaf" İctimai Birliyinin 150 Çağrı mərkəzinə müraciət etmək mümkündür.