"Azərkosmos” ikinci dəfə “Qadınlar üçün kosmos” adlı üçaylıq mentorluq proqramını elan edir.
“Tehsil365” xəbər verir ki, Azərbaycan Kosmik Agentliyi (“Azərkosmos”) ikinci dəfə “Qadınlar üçün kosmos” adlı üçaylıq mentorluq proqramını elan edib. Proqramın məqsədi Azərbaycanda qadınların kosmos sahəsindəki potensialını aşkar etmək, onlara təhsil və karyera yolunda fərdi mentorluq dəstəyi göstərmək və qlobal əməkdaşlıqda iştiraklarını dəstəkləməkdir.
Hazırda kosmik sənayedə qadınların payı 20 faiz təşkil edir və bu, yalnız başlanğıcdır. Kosmik sektorda qadınların daha geniş təmsil olunması üçün müxtəlif təşəbbüslər həyata keçirilir. NASA, ESA, SpaceX və digər təşkilatlarda qadınlar mühəndislik, tədqiqat və rəhbərlik kimi mühüm vəzifələrdə fəaliyyət göstərirlər.
"Azərkosmos"un təşkil edəcəyi üçaylıq mentorluq proqramı aprel-iyun aylarını əhatə edəcək. İştirakçılar beynəlxalq kosmik sahənin mütəxəssisləri ilə bilik mübadiləsi aparmaq imkanı əldə edəcəklər. Proqrama 18-35 yaş arası qadınlar müraciət edə bilərlər. Müraciətlər martın 11-dək qəbul olunur.
Proqramın elan olunması BMT-nin Kosmos Məsələləri üzrə İdarəsi (UNOOSA) tərəfindən “Qadınlar və qızlar elmdə” Beynəlxalq Gününün 10-cu ildönümü ilə eyni vaxta təsadüf edir.
Proqrama müraciət edənlər arasında seçimlər nəticəsində 10 nəfər beynəlxalq mentorlarla birbaşa əlaqə quracaq və aylıq görüşlərdə iştirak edəcəklər. Mentorluq sessiyaları kosmik sənayenin müxtəlif sahələrindən olan ekspertlərin seminarları ilə zənginləşdiriləcək.
Ötən il keçirilən proqram böyük maraq doğurmuş və 150-dən çox müraciət qəbul olunmuşdu. Bu proqram, azərbaycanlı qadınların kosmos və texnologiya sahələrinə olan marağını artırmaq üçün vacib bir platforma rolunu oynayır.