İtaliyada arxeoloqlar 2500 il əvvələ aid Etrusk qəbirini üzə çıxarıblar. Qəbirin divarları parlaq qırmızı rəngli freskalarla bəzədilib və burada nadir metallurgiya səhnəsi təsvir olunub.
“Tehsil365” xəbər verir ki, İtaliya Mədəniyyət Nazirliyinin məlumatına görə, qəbirin divarlarında rəqs edən kişilər və qadınlar, fleyta çalan bir musiqiçi təsviri yer alıb. Ən maraqlı tapıntılardan biri isə dəmirçi emalatxanasını əks etdirən freskadır.
Qəbirin bu cür təsvirlərə malik olması mərhumun ailəsinin metal sənayesi ilə məşğul olduğunu göstərir. Tədqiqatçılar qəbirin dəfn mərasimini əks etdirən səhnələri ehtiva etdiyini düşünürlər. Lakin burada heç bir yazı, insan qalıqları və ya dəfn hədiyyələri tapılmayıb ki, bu da məzarın əvvəlcədən talan edildiyini göstərir.
Mütəxəssislər divar rəsmlərinin daha çox detallarını üzə çıxarmaq üçün multispektral analiz aparmağı planlaşdırırlar.