Cahan Məmmədzadə Saleh oğlu, 24 avqust 1994-cü ildə İsmayıllı rayonunun Təzəkənd kəndində anadan olmuşdur. Kiçik yaşlarından Vətənə olan sevgi və bağlılıq hissi ilə böyüyən Cahan, 2012-2014-cü illərdə hərbi xidmətə çağırılmış və Qazaxda yerləşən hərbi hissədə xidmətini başa vurmuşdur. 2014-cü ilin sonlarına doğru, Azərbaycan Silahlı Qüvvələrinin Təlim və Tədris Mərkəzində "motaatıcı tağım komandirinin müavini" kursunu bitirərək gizir rütbəsi almışdır. Cahan Məmmədzadə hərbi xidmətini müxtəlif hərbi hissələrdə davam etdirərək döyüş hazırlığına böyük önəm vermişdir. O, xidmət etdiyi hərbi hissə vəzifələrini ləyaqətlə yerinə yetirərək, döyüş əməliyyatlarına hazır olmaq üçün daima öz üzərində çalışmışdır. Gədəbəy rayonunun Novosaratovka qəsəbəsində və adsız yüksəkliklərdə yerləşən hərbi hissələrdə döyüş tapşırıqlarını yerinə yetirib. 2016-cı il Aprel döyüşlərində də fəal iştirak etmişdir. 2020-ci il sentyabrın 27-də başlayan Vətən müharibəsi zamanı Cahan Məmmədzadə öz döyüş tapşırıqlarını icra etmək üçün cəbhəyə könüllü yola düşmüşdür. Şuşa uğrunda gedən döyüşlərdə iştirak edərək, xüsusi təyinatlılarla çiyin-çiyinə döyüşmüş, müharibənin ən ağır anlarında belə döyüş ruhunu yüksək tutmuşdur. Cahanın ən son danışığında, Şuşaya yalnız 5 kilometrlik məsafə qaldığını və Şuşanı azad edib geri qayıdacağına ümid etdiyini bildirmişdir. Lakin, 7 noyabr 2020-ci ildə Şuşa döyüşləri zamanı qəhrəmancasına şəhid olmuşdur. Cahan Məmmədzadənin şəhidliyi, yalnız ailəsi üçün deyil, bütün Azərbaycan xalqı üçün böyük itki olmuşdur. O, ömrünü Azərbaycan torpaqlarının azadlığına həsr etmiş, qəhrəmancasına Vətənin müdafiəsi uğrunda canını fəda etmişdir. Azərbaycan Prezidenti İlham Əliyev tərəfindən Cahan Məmmədzadə ölümündən sonra "Vətən uğrunda", "Şuşanın azad olunmasına görə" və "Hərbi xidmətlərə görə" medalları ilə təltif edilmişdir. Cahan Məmmədzadə yalnız döyüş meydanında deyil, həm də onun ailəsinə və yaxınlarına olan sevgisi ilə örnək bir şəxsiyyət olaraq yaddaşlarda qalır. İsmayıllı rayonunun Təzəkənd kəndində, Cahanın məzarı ziyarət edilərək, ruhuna dualar oxunmuş və anım mərasimləri keçirilmişdir. O, şəhid olduqdan sonra, xalq tərəfindən böyük hörmətlə yad edilmiş, onun qəhrəmanlığı və igidliyi hər zaman anılacaqdır. Cahanın adı, Azərbaycanın müstəqilliyi və ərazi bütövlüyü uğrunda canını fəda edən digər qəhrəmanlarla birgə, gələcək nəsillərə ilham verəcəkdir. Onun döyüşdəki şücaəti və əzmi, hər bir azərbaycanlının qəlbində yaşamağa davam edəcəkdir. Şəhidin atası Saleh Məmmədov bildirib ki, oğlu ilə fəxr edir. "Vətənin bütövləşməsində oğlumun da iştirakı ilə qürur duyuram. Onun ruhuna hörmət əlaməti olaraq evimizə gələn hər bir qonağa, Şəhidlər xiyabanına və məzarlığa baş çəkən rayon sakinlərinə təşəkkür edirəm. Şəhidlərimizin əziz xatirələrini ehtiramla yad etmələri şəhidlərə olan böyük ehtiramdan xəbər verir. Bunlar şəhidlərimizin daim qəlblərdə yaşaması deməkdir." Şəhidin anası İlhamə xanım Məmmədova qeyd edib ki, Cahan qisas hissi ilə yaşayırdı. "Bir dəfə mənə “Səni şəhid anası edəcəyəm”, demişdi. Oğlum buna əməl etdi. Mən oğlumla fəxr edirəm. Kədərliyəm ki, yeganə oğlumu itirdim, qürurluyam ki, şəhid anasıyam".
Azərbaycan Dövlət Pedaqoji Universitetinin tarix fakültəsinin 2-ci kurs Tələbəsi Cəfərli Ramin Ramil oğlu.