Azərbaycanın gənc futbolçularını bir araya gətirən "Young Pro" futbol klubu beynəlxalq arenada iştirakını davam etdirir. Klub artıq dördüncü dəfədir ki, xarici turnirlərdə iştirak edərək ölkəmizi layiqincə təmsil edir.
Bu fikirləri "Tehsil365"ə açıqlamasında "Young Pro" klubunun təsisçisi və baş məşqçisi Emin Süleymanov deyib. O qeyd edib ki, "İndiyədək komandamız iki dəfə Gürcüstanda, bir dəfə isə Türkiyədə rəsmi turnirlərdə çıxış edib. Bu dəfə isə Litvanın Vilnus şəhərində keçirilən nüfuzlu turnirə dəvət almışdıq. Birbaşa uçuş olmadığı üçün əvvəlcə tranzit reysi ilə Varşavaya, oradan isə Vilnusa yola düşdük."
Baş məşqçinin sözlərinə görə, turnir Litvanın rəsmi yarışlarından biri hesab olunur və sentyabr aylarında Batumidə, fevral-mart aylarında isə Vilnusda təşkil edilir. "Bu dəfəki yarışda da güclü komandalar iştirak edirdi. Qrupumuzda Litvanın bir nömrəli akademiyası, Latviyanın 'Riqa' komandası və hətta 'Hertha Berlin' klubu var idi. Gərgin keçən oyunlarda 5 görüş keçirdik, 4 oyunda məğlub olmağımıza baxmayaraq, qazandığımız bir qələbəyə çox sevindik. Bu, bizim üçün böyük təcrübə oldu."
Emin Süleymanov komandası üçün ən önəmli oyunlardan birinin "Hertha Berlin"ə qarşı baş tutduğunu bildirib: "Gənc futbolçularımız güclü rəqibə qarşı mübarizə apardılar və bu oyunun hər anından öyrənməyə çalışdılar. Sonda xatirə şəkli çəkdirdik. Azərbaycan bayrağının beynəlxalq arenada dalğalanması isə bizim üçün xüsusi qürurverici an oldu."
Məşqçi əlavə edib ki, turnirin sonunda "Young Pro" növbəti beynəlxalq yarışlara da dəvət alıb. "Bu cür turnirlər gənc futbolçularımızın dünya görüşünün formalaşması, təcrübə qazanması və inkişaf etməsi üçün olduqca vacibdir. Gələcəkdə daha böyük uğurlar qazanmaq üçün çalışmalarımızı davam etdirəcəyik," – deyə Emin Süleymanov vurğulayıb.
