Tailandın paytaxtı Banqkokda keçirilən “International Math Challange” riyaziyyat yarışında iştirak edən şagirdlərimiz Azərbaycanı müvəffəqiyyətlə təmsil ediblər.
Tailandın Azərbaycandakı səfirliyindən “Tehsil365"ə bildirilib ki, Tailand Təhsil Nazirliyi tərəfindən fevralın 12-dən 17-dək təşkil olunan yarışda dünyanın 80-dən çox ölkəsi qalib adı uğrunda mübarizə aparıb. Bu xüsusda, Azərbaycan komandası 16 şagirdlə 5 kateqoriyada zəkalarını nümayiş etdirib. Belə ki, Cüneyd Qənbərov qızıl; Daria Dmitriyeva, Davud Adışirinli, Cəsur Əlizadə, Paşa Cabbarlı gümüş; Əli Cəbrayılzadə, Aslı Topalova, Nilay Mustafayeva, Ayxan Abbaslı, Mehdi İbrahimov bürünc medal əldə ediblər. Digər şagirdlərimiz - Minayə Hacılı, Əli Hüseynzadə, Yusif Abbasov, Əlixan Əsədov, Yusif Qocayev, Mixail Dmitriyev isə fəxri fərmana layiq görülüblər.
Fevralın 16-sı keçirilən mükafatlandırma mərasimində Azərbaycan Respublikasının Tailanddakı səfiri Elçin Bəşirov iştirak edib, şagirdlərə uğurlar arzulayıb. Mükafatlandırmada Tailand Təhsil Nazirliyinin, Mədəniyyət Nazirliyinin və digər dövlət qurumlarının yüksəkvəzifəli şəxsləri, 10-a yaxın ölkədən səfir və baş konsul, eyni zamanda, universitet rektorları qaliblərə medal və sertifikatlar təqdim ediblər.
