Azərbaycan Dövlət İqtisad Universitetinin (UNEC) rektoru, professor Ədalət Muradov, Riyaziyyat və Mexanika İnstitutunun direktoru, professor Misir Mərdanov, Azərbaycanda Atatürk Mərkəzinin direktoru, akademik Nizami Cəfərov, təhsil üzrə ekspert, fəlsəfə doktoru Etibar Əliyev və UNEC rəsmiləri Azərbaycan Dövlət Aqrar Universitetində (ADAU) olublar.
AZƏRTAC-ın bölgə müxbiri xəbər verir ki, ADAU-nun professor-müəllim heyəti ilə görüşdə birgə əməkdaşlıq çərçivəsində həyata keçirilə biləcək layihələr müzakirə edilib.
ADAU-nun rektoru Zəfər Qurbanov görüşdə birəsrlik tarixə malik Aqrar Universitetin maddi-texniki bazası və qarşıya qoyduğu hədəflər barədə ətraflı məlumat verib.
UNEC-in rektoru Ədalət Muradov çıxışında tədqiqatçıların birgə mübadiləsi, yüksək reytinqli jurnallarda məqalə çapı, həmçinin beynəlxalq nüfuzlu reytinq siyahılarında qərarlaşmaq üçün hədəflər və birgə görülə biləcək işlər barədə danışıb.
Riyaziyyat və Mexanika İnstitutunun direktoru Misir Mərdanov bildirib ki, Aqrar Universitet dövlətin əsas prioritet sahələrindən olan aqrar sektora kadr hazırlayan ali təhsil müəssisəsi kimi daim diqqət mərkəzindədir.
Atatürk Mərkəzinin direktoru Nizami Cəfərov isə deyib ki, qeyri-neft sektorunda böyük rolu olan kənd təsərrüfatı sahəsi üzrə mütəxəssis hazırlığı ölkəmiz üçün mühüm əhəmiyyət daşıyır.
Görüş müzakirələrlə davam edib.
Sonda universitetə xatirə kitabları təqdim olunub.
