Martın 2-də Lənkəran-Astara Regional Təhsil İdarəsinin tabeliyində fəaliyyət göstərən ümumi təhsil müəssisələrinin V, VI və VII sinif şagirdlərinin iştirakı ilə Lütfi Zadə adına riyaziyyat-məntiq olimpiadası və Məktəblilərarası fənn müsabiqələrinin rayon (şəhər) mərhələsi keçirilib.
Bu barədə "Tehsil365"ə Lənkəran-Astara Regional Təhsil İdarəsindən məlumat verilib. Lənkəran-Astara regionu üzrə müsabiqələrdə iştirak etmək üçün 10409 şagird qeydiyyatdan keçib. Onlardan 9378 nəfəri 27 mərkəzdə təşkil olunan müsabiqələrdə iştirak edib.
Lütfi Zadə adına riyaziyyat-məntiq olimpiadası V sinif şagirdləri üçün, Fənn müsabiqələri isə VI və VII siniflər üçün təşkil olunub. VI sinif şagirdləri riyaziyyat, informatika və təbiət fənləri, VII sinif şagirdləri isə riyaziyyat, fizika, kimya və biologiya fənləri üzrə imtahan veriblər.
Müsabiqələrin əsas məqsədi istedadlı şagirdləri aşkar etmək, onların məntiqi və yaradıcı düşünmə bacarıqlarını inkişaf etdirmək, sağlam rəqabət mühiti formalaşdırmaq və şagirdlərlə məqsədyönlü iş aparmaqdır.
Qeyd edək ki, müsabiqə nəticələrinin 14 martdan etibarən elan edilməsi nəzərdə tutulub. Uğur qazanan şagirdlər növbəti mərhələdə iştirak hüququ əldə edəcəklər.
Şagirdlərimizə müvəffəqiyyətlər arzulayırıq!
