4 mart 2025-ci il tarixində Təhsildə Keyfiyyət Təminatı Agentliyi (TKTA) “Qənnadıçı, şirniyyatçı” və “Aşpaz” peşə ixtisasları üzrə praktiki imtahan keçirib. İmtahanda ümumilikdə 17 nəfər namizəd iştirak edib.
Agentlikdən “Tehsil365”ə bildirilib ki, “Qənnadıçı, şirniyyatçı” və “Aşpaz” peşə ixtisasları üzrə qeyri-formal və informal yollarla əldə edilmiş bacarıq, səriştə və təcrübələrin qiymətləndirilməsi istiqamətində nəzəri imtahanı uğurla keçən namizədlər praktiki imtahan üçün “Honey Cake studio” MMC-nin istehsalat bazasına dəvət olunublar.
TKTA-nın Qeyri-formal və informal təhsilin tanınması şöbəsinin aparıcı məsləhətçisi Şəbnəm Camalzadənin sədrlik etdiyi Qiymətləndirmə Komissiyasının tərkibində işəgötürən tərəfin nümayəndəsi qismində “Honey Cake studio” MMC-nin direktoru Gülnar Rəsulova, sahə üzrə müstəqil ekspert qismində isə təlimçi ekspert Kəminə Əsədova iştirak ediblər.
Sözügedən fəaliyyətin əsas məqsədi vətəndaşların əmək bazarında özünüməşğulluq imkanlarının artırılmasına və bu sahədə həyata keçirilən dövlət siyasətinə dəstək göstərməkdən ibarətdir.
Yekunda hər iki mərhələdə uğur qazanan namizədlər “Qənnadıçı, şirniyyatçı” və “Aşpaz” peşə ixtisasları üzrə sənədlə (sertifikatla) təltif olunublar.
Agentlik tərəfindən təqdim edilən sözügedən sənəd Azərbaycan Respublikasının Nazirlər Kabinetinin 5 avqust 2020-ci il tarixli 279 nömrəli Qərarına əsasən, müraciətçiyə peşə ixtisası üzrə əmək fəaliyyətinə başlamaq hüququ verir.
