Beynəlxalq Qadınlar Günü hər il 8 martda qeyd olunur və qadın hüquqlarının müdafiəsi, gender bərabərliyi və qadınların cəmiyyətdəki roluna diqqət çəkmək məqsədi daşıyır. Bu günün yaranması XX əsrin əvvəllərində qadınların əmək, seçki və sosial hüquqları uğrunda apardıqları mübarizə ilə bağlıdır.
"Tehsil365"in məlumatına görə, 1908-ci ildə ABŞ-ın Nyu-York şəhərində minlərlə qadın iş şəraitinin yaxşılaşdırılması və səsvermə hüququ uğrunda yürüş etdi. 1909-cu ildə Amerika Sosialist Partiyası ilk dəfə Milli Qadınlar Gününü elan etdi. 1910-cu ildə Danimarkanın paytaxtı Kopenhagendə keçirilən Sosialist Qadınlar Konfransında Clara Zetkinin təşəbbüsü ilə bu gün beynəlxalq miqyasda qeyd olunmağa başladı.
1911-ci ildə Avstriya, Almaniya və İsveçrə də daxil olmaqla bir neçə ölkədə ilk genişmiqyaslı tədbirlər təşkil olundu. Həmin il ABŞ-ın Nyu-York şəhərində Triangle fabrikində baş verən yanğın 140-dan çox qadının həyatına son qoydu və qadınların əmək hüquqları ilə bağlı mübarizəsini daha da gücləndirdi.
1917-ci ildə Rusiyada qadın fəhlələrin çörək və sülh tələbi ilə keçirdiyi etiraz aksiyaları inqilaba səbəb oldu və nəticədə qadınlara səsvermə hüququ verildi.
1977-ci ildə Birləşmiş Millətlər Təşkilatı (BMT) 8 Martı rəsmi Beynəlxalq Qadınlar Günü elan etdi.
Hazırda 8 Mart dünyanın bir çox ölkəsində qadınların hüquq və azadlıqlarına diqqət çəkmək üçün müxtəlif tədbirlərlə qeyd edilir. Bəzi ölkələrdə isə bu gün qadınlara hörmət və sevginin ifadə edildiyi bayram kimi qəbul edilir.
Azərbaycan da daxil olmaqla bir sıra ölkələrdə 8 Mart rəsmi qeyri-iş günü hesab olunur və bu tarixdə qadınlar müxtəlif tədbirlər, təbriklər və sosial layihələrlə ön plana çıxır.