Gəncə şəhər İ.Məmmədov adına 27 nömrəli məktəb-liseyin XI sinif şagirdi Hüseyn İsmayılov “Sabahın alimləri” XIV Respublika layihə müsabiqəsində birinci yerin qalibi olub.
Bu barədə "Tehsil365"ə Gəncə Şəhər Təhsil Sektorundan məlumat verilib. Bildirilib ki, Hüseyn müsabiqədə kompüter elmləri nominasiyası üzrə "ALS və iflic xəstələri üçün CNN ilə dəstəklənən ucuz qiymətli göz hərəkəti ilə cihaz idarəetmə sistemi" layihəsi ilə iştirak edərək yüksək nəticə göstərib.
Müsabiqənin keçirilməsində məqsəd elmi-tədqiqat və yaradıcılıq potensialı olan istedadlı şagirdləri üzə çıxarmaq, onların tənqidi düşünmə, problem həlletmə, vaxtın idarə olunması, natiqlik və ünsiyyət bacarıqlarını inkişaf etdirməkdir. Eyni zamanda, bu yarış ali təhsil müəssisələri və elmi təşkilatlarla ümumi təhsil müəssisələri arasında əlaqələri genişləndirmək və şagirdlərin oxşar maraqları olan həmyaşıdları ilə şəbəkələşməsini təmin etməyi hədəfləyir.
Qeyd edək ki, müsabiqə Elm və Təhsil Nazirliyi, Heydər Əliyev Mərkəzi, Təhsil İnstitutu, Azərbaycan Milli Elmlər Akademiyası (AMEA) və Azərbaycan Təhsil İşçiləri Azad Həmkarlar İttifaqı Respublika Komitəsinin təşkilatçılığı və tərəfdaşlığı ilə keçirilib.