Lənkəranda təhsilin keyfiyyətinin artırılması məsələlərinə həsr olunmuş görüş keçirilib
"Tehsil365" xəbər verir ki, martın 15-də Elm və Təhsil Nazirliyi, Dövlət Məşğulluq Agentliyi və Lənkəran-Astara Regional Təhsil İdarəsinin dəstəyi ilə “Regional İnkişaf” İctimai Birliyi tərəfindən regionlarda təhsilin keyfiyyətinin artırılması məsələlərinə həsr olunmuş görüş baş tutub.
Görüşün açılışı və əsas məqamlar:
Görüş iştirakçılarını salamlayan Azərbaycan Respublikası Milli Məclisinin deputatı, ADA Universitetinin prorektoru Fariz İsmayılzadə, ölkədə təhsil sahəsində aparılan islahatların vacibliyini vurğulayıb. O, xüsusilə regionlarda təhsilin keyfiyyətinin yüksəldilməsinin yalnız maddi-texniki baza ilə deyil, müəllim hazırlığı, metodika və şagirdlərin bilik-bacarıqlarının inkişafı ilə mümkün olduğunu qeyd edib.
Daha sonra “Regional İnkişaf” İctimai Birliyinin nümayəndəsi Təbriz Rzayev inklüziv təhsilin təşviqi, müəllimlərin bilik və bacarıqlarının artırılması, aztəminatlı və digər həssas kateqoriyadan olan şəxslərin təhsilinə dəstək, məktəblilərin düzgün ixtisas seçimi və ali təhsil ixtisaslarının təkmilləşdirilməsi istiqamətində həyata keçirilən layihələr barədə danışıb.
Lənkəran-Astara Regional Təhsil İdarəsinin Tədrisin keyfiyyəti sektorunun müdiri Hafiz Pənahov təhsil sahəsində aparılan islahatların regionlarda keyfiyyətin artırılmasına töhfə verəcəyini bildirib.
Panel müzakirələr:
Panel müzakirələr çərçivəsində Fariz İsmayılzadə ali təhsil müəssisələrinin innovasiya və tədqiqat mərkəzləri kimi fəaliyyət göstərməsinin vacibliyindən bəhs edib. O, universitetlərdə elmi-tədqiqat işlərinin genişləndirilməsi, tələbələrin analitik və tənqidi düşünmə bacarıqlarının inkişafı üçün yeni metodologiyaların tətbiqinin zəruri olduğunu vurğulayıb.
ADA Universitetinin prorektor məsləhətçisi Anar Vəliyev daha yaxşı araşdırma üsulları və universitet təhsilinin inkişafı yolları haqqında danışıb. O, ADA Universitetinin beynəlxalq əməkdaşlıqları, xaricdə təhsil imkanları və tələbələrin qlobal trendlərə uyğun bilik və bacarıqlarla təmin olunması istiqamətində görülən işlər barədə məlumat verib.
