Gəncə-Daşkəsən Regional Təhsil İdarəsinin tabeliyindəki 13 ümumi təhsil müəssisəsində “Məktəblilərarası Milli Hakaton” mərkəzləri fəaliyyətə başlayıb. Bu mərkəzlər internet və texniki imkanları məhdud olan şagirdlərin hakaton yarışmalarına maneəsiz qoşulmasını təmin etmək məqsədilə yaradılıb.
“Tehsil365” xəbər verir ki, hazırda Gəncə-Daşkəsən Regional Təhsil İdarəsi üzrə 5-11-ci siniflərdə təhsil alan 22 464 şagird hakatonda iştirak edir. Qeydiyyat prosesi davam etdiyi üçün bu rəqəmin daha da artacağı gözlənilir.
Şagirdlər yaşadıqları əraziyə yaxın hakaton mərkəzlərinə müraciət edərək yarışmalara qoşula bilərlər. Mərkəzlərin fəaliyyəti çərçivəsində müxtəlif tədbirlər həyata keçiriləcək, şagirdlərin bacarıqlarının inkişafı üçün əlavə imkanlar yaradılacaq.
Tədbirlər təhsil müəssisələrinin inkişafına töhfə verməklə yanaşı, şagirdlərin texnoloji və innovativ bacarıqlarının artırılmasına da müsbət təsir göstərəcək.
