Qarabağ Universitetində İlaxır Çərşənbə və Novruz bayramı münasibətilə möhtəşəm tədbir və konsert proqramı təşkil edilib.
“Tehsil365” xəbər verir ki, tədbiri giriş sözü ilə açan Qarabağ Universitetinin rektoru Şahin Bayramov, milli bayramımız Novruzun İlaxır Çərşənbəsini Xankəndidə qeyd etməyin qürurunu vurğulayıb. O, bu tarixi hadisənin xalqımızın əzmi, Prezident İlham Əliyevin siyasi iradəsi və ordumuzun rəşadətinin nəticəsi olduğunu bildirib. Rektor, universitetin professor-müəllim, inzibati və tələbə heyətini əziz bayram münasibətilə təbrik edərək, Novruzun birlik və həmrəylik gətirməsini arzulayıb.
Tədbirin rəsmi hissəsindən sonra bayram şənliyi bədii proqramla davam edib. Qarabağ Universitetinin tələbələri milli rəqslər və Novruz adət-ənənələrini əks etdirən səhnəciklər təqdim ediblər. Həmçinin, müəllim və tələbələrin ifasında milli mahnılar səsləndirilib.
Bayram tonqalının ətrafında universitetin müəllim və tələbə heyətinin iştirakı ilə yallı rəqsi təşkil olunub. Tədbir iştirakçıları Novruzun xoş ovqatını birlikdə paylaşaraq, bayramın əsas dəyərləri olan sülh, birlik və həmrəyliyi qeyd ediblər.
