Cəbrayıl, Qubadlı və Zəngilan rayonlarında Azərbaycan Respublikası Prezidentinin Xüsusi nümayəndəliyinin və Şərqi Zəngəzur Regional Təhsil İdarəsinin birgə təşkilatçılığı ilə Cəbrayıl şəhəri Mehdi Mehdizadə adına tam orta ümumtəhsil məktəbində Novruz bayramı ilə əlaqədar təntənəli tədbir keçirilib.
“Tehsil365” AZƏRTAC-a istinadən xəbər verir ki, bayram tədbirində Cəbrayıl, Qubadlı və Zəngilan rayonlarında Azərbaycan Respublikası Prezidentinin Xüsusi nümayəndəliyinin və Şərqi Zəngəzur Regional Təhsil İdarəsinin əməkdaşları, müəllimlər, şagirdlər, valideynlər iştirak ediblər.
Bayram mərasimində adət-ənənələrimizin nümayiş olunduğu guşə yaradılıb, həmçinin Novruz bayramının rəmzi olan səməni, müxtəlif şirniyyat və mətbəx nümunələri süfrələri bəzəyib. Məktəbin şagirdləri baharın gəlişinin müjdəçisi olan Novruz bayramına aid şeirlər səsləndirib, mahnılar ifa edib, maraqlı səhnəciklər göstəriblər. Şagirdlərin ifasında rəqslər, xalq oyunları, Keçəl və Kosanın məzəli əhvalatları bayram şənliyinə xüsusi gözəllik qatıb.
Sonda məktəbin həyətində bayram tonqalı qalanıb, qonaqlar, müəllimlər və şagirdlər "Cəngi" sədaları altında rəqs ediblər.
