Qazax-Tovuz Regional Təhsil İdarəsinin tabeliyində fəaliyyət göstərən təhsil müəssisələrində Novruz bayramı ilə əlaqədar silsilə tədbirlər keçirilib.
“Tehsil365” xəbər verir ki, tədbirlərdə şagirdlərə Novruzun tarixi, milli-mənəvi dəyərlərimizdəki yeri və əhəmiyyəti barədə geniş məlumat verilib. Qeyd olunub ki, Novruz bayramı sülh və əmin-amanlığın, həmrəyliyin və mehribanlığın rəmzidir. Şagirdlərin diqqətinə milli adət-ənənələrin qorunması və gələcək nəsillərə ötürülməsinin vacibliyi çatdırılıb, həmçinin su, od, yel və torpaq çərşənbələrinin mahiyyəti və Novruz atributları barədə danışılıb.
Bayram şənliyində şagirdlər Novruza həsr olunmuş mahnılar ifa edib, şeirlər səsləndirib və maraqlı səhnəciklər nümayiş etdiriblər. Azərbaycanın bütün ərazisində bu bayramın yenidən qeyd olunmasının xalqımıza böyük sevinc bəxş etdiyi xüsusi vurğulanıb.
