Azərbaycan universitetlərinin tələbələrinin kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələrində təcrübə mübadiləsi ilə bağlı Türkiyəyə səfəri başa çatıb.
“Tehsil365” xəbər verir ki, səfər Azərbaycan Kosmik Agentliyinin (“Azərkosmos”) nəzdində fəaliyyət göstərən KOSMİK Akademiyanın təşkilatçılığı və Türkiyənin Gökmen Aerokosmik və Aviasiya Mərkəzinin (GUHEM-Gökmen Uzay ve Havacılık Merkezi) dəstəyi, eləcə də Azərbaycan Respublikası Elm və Təhsil Nazirliyi, Elm və Ali Təhsil üzrə Dövlət Agentliyi və SABAH qruplarının əməkdaşlığı ilə ərsəyə gəlib.
Azərbaycanlı tələbələrin və gənc alimlərin Türkiyədə həyata keçirilən nəzəri və praktiki təcrübə mübadiləsi proqramı ölkəmizin kosmik, aerokosmik, aviasiya, süni intellekt, mühəndislik, texnologiya və innovasiya sahələrində insan kapitalının formalaşdırılması və inkişafı baxımından mühüm strateji əhəmiyyət kəsb edir.
Azərbaycanın regionda və dünyada innovasiya sahəsi ilə bağlı inkişafını təmin etmək baxımından mühüm əhəmiyyət daşıyan bu proqramlar gənclərin elmi, praktik, nəzəri biliklərinin artırılmasına, onların kosmik, innovativ, hərbi, müdafiə potensiallı texnologiyalarla tanışlığına dəstək verir.
Tələbə və gənc alimlərimiz də daxil olmaqla ümumilikdə 26 nəfərlik heyətlə edilən səfər çərçivəsində Türkiyənin Bursa, Ankara və İstanbul şəhərlərində nəhəng hərbi, kosmik, texnologiya şirkətləri ilə görüşlər keçirilib, astronavtika, aeronavtika və aviasiya sahəsi üzrə fəaliyyətlərlə əyani tanışlıq imkanı əldə edilib.
Səfərin uğurla yekunlaşması ilə yanaşı, növbəti mərhələdə tələbə və gənc alimlərimizin Türkiyənin tanınmış kosmik və müdafiə sənayesi şirkətlərində uzunmüddətli təcrübə mübadiləsi, müştərək layihələr və proqramlara cəlb olunması planlaşdırılır. Bu strateji yanaşma Azərbaycan və Türkiyə arasında texnoloji sahədə davamlı tərəfdaşlığı möhkəmləndirərək hər iki ölkənin gənc nəslinin gələcəyə hazırlanması baxımımdan mühüm əhəmiyyət kəsb edir.
Bu istiqamətdə atılan addımlar ölkəmizin regionda və dünyada innovativ texnologiyalar sahəsində rəqabət qabiliyyətini daha da artıracaq, gələcək nəsillər üçün yüksək səviyyəli mütəxəssis və mühəndislərin yetişdirilməsini təmin edəcək.
Martın 14-dən 19-dək davam edən proqramda Azərbaycandan KOSMİK Akademiyanın rəhbəri İmran Muxtarov, Milli Aviasiya Akademiyasının dekanı Firdovsi Mahmudlu, SABAH qrupları İcra Komitəsinin rəhbəri Elza Səmədova, Milli Aviasiya Akademiyasının sektor müdiri Rabil Mürsəlov, SABAH qruplarının Tələbə işləri üzrə direktor müavini Sevinc Əliyeva, “Azərkosmos”un İnsan resurslarının idarə edilməsi və sənədləşmə departamentinin direktoru İnarə İbrahimxəlilova iştirak ediblər.
Təcrübə mübadiləsinə Azərbaycanın 14 universitetini təmsil edən tələbələr, gənc alimlər, o cümlədən “Azərkosmos” və “Zəfər” təşkilatının əməkdaşlığı ilə üç şəhid və qazi övladı da cəlb olunub.
