Qazax-Tovuz Regional Təhsil İdarəsinin tabeliyindəki təhsil müəssisələrində Novruz bayramı ilə əlaqədar tədbirlər keçirilib.
Bu barədə "Tehsil365"ə Qazax-Tovuz Regional Təhsil İdarəsində məlumat verilib. Bildirilib ki, xalqımızın hər il böyük coşqu və sevinclə qeyd etdiyi, əsrlərin sınağından çıxmış mənəvi dəyərlərimizi, adət-ənənələrimizi özündə əks etdirən Novruz bayramı haqqında şagirdlərə geniş məlumat verilib. Novruzun sülh və əmin-amanlığın, insanlar arasında birlik və mehribanlığın carçısı olduğu vurğulanıb.
Milli adət-ənənələrin gələcək nəsillərə ötürülməsinin və milli-mənəvi dəyərlərimizin qorunub saxlanılmasının vacibliyi şagirdlərin diqqətinə çatdırılıb. Eyni zamanda, su, od, yel və torpaq çərşənbələrinin mahiyyəti və Novruz atributlarından bəhs edilib. Novruz bayramının Azərbaycanın bütün ərazisində yenidən qeyd olunmasının insanlara ayrıca bir sevinc bəxş etdiyi nəzərə çatdırılıb.
Tədbirlərdə şagirdlər baharın təravətli nəfəsini özü ilə gətirən Novruz bayramına aid mahnılar ifa edib, şeirlər səsləndirib, maraqlı səhnəciklər nümayiş etdiriblər.
