Azərbaycan ali təhsil məkanında ilk dəfə olaraq 2022-ci ildə yaradılan Naxçıvan Dövlət Universitetinin (NDU) IELTS Qeydiyyat və İmtahan Mərkəzi uğurlu nəticələr əldə etməkdə davam edir.
"Tehsil365" xəbər verir ki, bu dəfə növbəti yüksək nəticə NDU nəzdində fəaliyyət göstərən Gimnaziyanın 11-ci sinif şagirdi Məcid Səfərlidə qeydə alınıb.
Məcid Səfərli 13 mart tarixində NDU IELTS Mərkəzində kompüter əsaslı akademik IELTS imtahanına girərək maksimum 9 bal üzərindən 7.5 bal toplayıb. Bu uğurlu nəticə ona Çin və İngiltərədəki nüfuzlu universitetlərə müraciət etmək imkanı qazandırıb.
Müsahibəsində Məcid, Naxçıvan Dövlət Universitetində IELTS imtahan mərkəzinin olmasını böyük bir fürsət kimi dəyərləndirib:
"Əvvəllər IELTS imtahanı vermək üçün başqa şəhərlərə və ya xaricə getmək lazım idi. İndi isə NDU-da bu imkanı əldə etmək böyük rahatlıqdır."
Məcid IELTS proqramına hazırlaşmadan öncə ingilis dili səviyyəsinin B1 olduğunu bildirib:
"Qrammatika və oxuma bacarıqlarım yaxşı olsa da, danışıq bacarığım zəif idi. IELTS hazırlığı zamanı bu sahədə özümü inkişaf etdirdim. İmtahan mənim üçün bir qədər stresli keçdi, xüsusilə dinləmə bölməsi imtahanın əvvəlində olduğu üçün gərginlik yaşadım. Lakin ümumilikdə yaxşı nəticə əldə etdim və 7.5 bal topladım."
Qeyd edək ki, NDU IELTS Qeydiyyat və İmtahan Mərkəzi Britaniya Şurası ilə əməkdaşlıq çərçivəsində fəaliyyət göstərir. Mərkəzdə bu günə qədər 250-dən çox müəllim, tələbə və şagird IELTS imtahanında iştirak edib. Bundan əlavə, 2023-cü ildən etibarən universitetdə SAT Qeydiyyat və İmtahan Mərkəzi də fəaliyyət göstərir. Burada 216 şagird imtahan verib, 5 nəfər isə İran və Türkiyə vətəndaşı olub.
NDU-da beynəlxalq imtahan mərkəzlərinin fəaliyyəti, IELTS və SAT imtahanları xarici universitetlərdə təhsil almaq istəyən gənclər üçün əlçatanlığı artırır.
Məlumat üçün bildirək ki, Naxçıvan Dövlət Universitetində növbəti rəsmi IELTS imtahanı 17 və 18 aprel tarixlərində keçiriləcək.
