Lənkəran-Astara Regional Təhsil İdarəsinin tabeliyindəki dövlət məktəbəqədər təhsil müəssisələrində vakant olan tərbiyəçi-müəllim vəzifələrinə yerdəyişmə prosesi başlayır.
"Təhsil365" xəbər verir ki, müsabiqədə hazırda dövlət məktəbəqədər təhsil müəssisələrində tərbiyəçi-müəllim vəzifəsində müddətsiz əmək müqaviləsi ilə çalışan şəxslər iştirak edə bilərlər. Yerdəyişmə ilə bağlı müraciətlərin qəbul edilməsi üçün namizədlər yaşayış yerinin dəyişməsinə dair müvafiq təsdiqləyici sənəd təqdim etməlidirlər. Qeyri-ixtisaslı tərbiyəçi-müəllimlər isə müsabiqədə iştirak edə bilməzlər.
Yerdəyişmə müsabiqəsində iştirak etmək istəyən namizədlər 01 aprel 2025-ci il tarixindən 08 aprel 2025-ci il tarixinədək bu link vasitəsilə qeydiyyatdan keçə bilərlər.
Tələb olunan sənədlər:
Şəxsiyyət vəsiqəsinin surəti;
Ali və ya orta ixtisas təhsili haqqında diplomun surəti;
Əmək kitabçasının surəti;
Yerdəyişmənin səbəbini təsdiqləyən dövlət qurumlarından əldə edilmiş arayışlar (yaşayış yerinin dəyişməsi, həyat yoldaşının iş yerinin dəyişməsi, tibbi göstərişlər və s.).
Təqdim olunmuş sənədlər komissiya tərəfindən yoxlanıldıqdan sonra tələblərə uyğun hesab edilən namizədlər barədə məlumatlar aidiyyəti məktəbəqədər təhsil müəssisələrinə göndəriləcək.
Bir vakant yerə birdən çox müraciət olduğu halda seçim aşağıdakı meyarlara əsasən aparılacaq:
Şəhid ailəsi üzvləri üstünlük qazanacaq;
Daha yüksək təhsil səviyyəsinə malik namizədlərə üstünlük veriləcək;
Pedaqoji stajı daha çox olan tərbiyəçilər üstün tutulacaq;
Həyat yoldaşı hərbçi, Vətən müharibəsi iştirakçısı və ya dövlət qulluqçusu olanlara üstünlük veriləcək;
Namizədlər tərbiyəçi-müəllimlərin işə qəbulu müsabiqəsində iştirak edibsə, test balı nəzərə alınacaq.
Vakant yerlərin siyahısı ilə bu linkdən tanış olmaq mümkündür.