Adında güc və qüvvət simvolunu daşıyan Tunarın aprelin 20-də 14 yaşı olacaq. O, Şəmkir şəhər F.Salmanov adına tam orta məktəbin 7-ci sinfində təhsil alır. Tunar Sultanzadə bu yaxınlarda sərbəst güləş üzrə 48 kq çəki dərəcəsində Azərbaycan çempionatının qalibi olub.
“Tehsil365” “Azərbaycan müəllimi”-ə istinadən xəbər verir ki,
“İdman dərslərimə mənfi təsir etmir”
Əksər idmançı kimi Tunar da danışmağı sevmir. Onun gücü dilində yox, qolundadır. Bununla belə, idmançı olduğuna görə məktəbdə şagirdlərin ona çəkinərək yox, hörmətlə yanaşdığını bildirir: “Məktəb təhsil ocağıdır, dava yeri deyil, burada yalnız qələm və kitab olmalıdır”.
Tunar məktəbi orta səviyyədə oxuyur və riyaziyyat fənnini sevir. O, idmanın dərslərinə mənfi təsir etmədiyini, əksinə, məktəbinin adını yüksəltməyə kömək etdiyini vurğulayır.
“Özümə güvəndim və qalib gəldim”
5 yaşından güləşlə məşğul olmağa başlayan Tunar deyir ki, atasının da güləşçi olması onun bu idman növünə marağını daha da artırıb. O, U15 Azərbaycan çempionatında qazandığı qızıl medalda məşqçisi Elçin Həsənovun əziyyətinin böyük olduğunu deməyi də unutmur:
“Elçin Həsənov çox yaxşı məşqçidir. O, hər zaman mənə güvən hissi bəxş edib və “sən bacaracaqsan!” deyərək məni həvəsləndirib. Final görüşündə Ruslan Mirzəyevlə mübarizə çətin oldu, amma özümə güvəndim və qalib gəldim!”.
"Bundan daha yüksək yerlərdə olacağıma inanıram", - deyən gənc idmançı gələcəkdə dünya və Olimpiya çempionu olmağı hədəfləyir. Məşq günlərində müəlliminin göstərdiyi xüsusi fəndlərə və fiziki hazırlığına xüsusi diqqət yetirərək özünü bu sahədə inkişaf etdirir.
Gələcəkdə güləşə davam edəcəyini deyən Tunarın idmana olan sevgisi onun bu yolda daha yüksək zirvələrə çatmasına səbəb olacaq. Üçrəngli bayrağımızı ən ali kürsülərdən dalğalandıracağına inanırıq, Tunar!
