Aprelin 1-də Bakı Slavyan Universitetində (BSU) 2024-2025-ci tədris ilində magistrantların elmi-tədqiqat təcrübəsinin yekun, elmi-pedaqoji təcrübəsinin başlanğıc konfransı keçirilib.
"Tehsil365" xəbər verir ki, konfransda çıxış edən BSU-nun rektoru Anar Nağıyev magistrantların bu təcrübə mərhələsində qazandıqları bilik və bacarıqların onların gələcək elmi və pedaqoji fəaliyyətinə mühüm töhfə verəcəyinə inandığını bildirib. O qeyd edib ki, son iki ildə BSU-nun Magistratura və doktorantura şöbəsi universitetin kadr potensialının formalaşması baxımından əsas platformalardan birinə çevrilib. Bu kontekstdə magistrantların yalnız tələbə kimi deyil, həm də universitet üçün potensial əməkdaş və gələcək doktorant kimi dəyərləndirilməsinin vacibliyi vurğulanıb.
A.Nağıyev çıxışında ümumilikdə 129 magistrantın 68 təcrübə rəhbəri ilə 18 kafedrada çalışacağını və təcrübəyə başlayan 129 magistrantdan beş nəfərinin əcnəbi (Çin və Türkiyə) BSU tələbəsi olduğunu qeyd edib.
Rektor magistrantların BSU-da işə cəlb olunması ilə bağlı təcrübəyə toxunaraq, onların müxtəlif fakültələrdə pedaqoji fəaliyyətə qoşulduğunu, bəzilərinin isə təhsilini başa vurmadan artıq kafedralarda müəllim kimi fəaliyyət göstərdiyini bildirib. O, universitetdə müəllim-tələbə münasibətlərinin bərabərhüquqlu tərəfdaşlıq əsasında qurulmasının vacibliyini diqqətə çatdırıb.
Anar Nağıyev magistrantların elmi fəaliyyətə cəlb olunmasının və onların tədqiqat nəticələrinin beynəlxalq jurnallarda nəşr edilməsinin sevindirici hal olduğunu qeyd edərək, bu tendensiyanın davam etdirilməsinin vacibliyini vurğulayıb. O bildirib ki, magistrantların universitetlə bağlılığı yalnız təhsil müddəti ilə məhdudlaşmamalıdır. Onların gələcəkdə BSU-da elmi-pedaqoji fəaliyyətlə məşğul olmaq perspektivləri nəzərə alınmalı və bu istiqamətdə sistemli iş aparılmalıdır.
Çıxışının sonunda rektor magistrantlara uğurlar arzulayaraq, onların bu təcrübə çərçivəsində qazandıqları biliklərin universitetin elmi inkişafına töhfə verəcəyinə əminliyini ifadə edib. O, bu prosesin peşəkar şəkildə təşkilinə görə Magistratura və doktorantura şöbəsinin bütün əməkdaşlarına təşəkkür edib.
Daha sonra BSU-nun Magistratura və doktorantura şöbəsinin müdiri Elnur Kəlbizadə elmi-tədqiqat təcrübəsinin statistik göstəriciləri, magistrantların kafedralar üzrə bölgüsü və təcrübənin təşkilati-metodik aspektləri barədə məlumat verib. E.Kəlbizadə bildirib ki, təcrübə dövründə magistrantlar xarici ölkələrdə keçirilən bir neçə beynəlxalq konfransda məruzələr ediblər və dörd magistrantın məqaləsi ABŞ, Finlandiya, Türkiyə və Avstraliyada nəşr edilib.
Elmi-pedaqoji təcrübə prosesinə hazırlıqla bağlı məlumat verən E.Kəlbizadə proseslə bağlı gözləntilər, bu ildən tətbiq ediləcək bir sıra yeniliklər barədə məlumat verib. O, pedaqoji prosesdə magistrantların iştirakını aktiv şəkildə təşkil etmək üçün kafedralarda simulyativ tədbirlərin keçirilməsinin nəzərdə tutulduğunu qeyd edib.
