"Konstitusiya və Suverenlik ili" çərçivəsində Bakı Slavyan Universitetinin (BSU) fəaliyyət planına uyğun olaraq BSU-nun nəzdindəki Məktəb-Lisey Kompleksində "Yeni dövrün Azərbaycanı" mövzusunda görüş keçirilib. Tədbirdə BSU-nun rektoru Anar Nağıyev və Yeni Azərbaycan Partiyasının (YAP) Nəsimi rayon təşkilatının sədri Azər Süleymanov iştirak edib.
"Tehsil365" xəbər verir ki, rektor Anar Nağıyev Prezident İlham Əliyevin sərəncamına əsasən 2025-ci ilin "Konstitusiya və Suverenlik ili" elan edildiyini bildirərək, bu cür görüşlərin şağirdlərin konstitusiya və suverenlik anlayışlarını dərindən qavramalarına kömək etdiyini vurğulayıb. O, ümummilli lider Heydər Əliyevin Azərbaycanın müstəqilliyinin möhkəmləndirilməsindəki rolu, 1993-cü ildən sonra hüquqi bazanın təkmilləşdirilməsi və 1995-ci il Konstitusiyasının qəbul edilməsi barədə şağirdlərə məlumat verib.
Rektor həmçinin, 1978-ci il Konstitusiyasında Azərbaycan dilinin dövlət dili kimi təsbit edilməsinin milli dövlətçiliyin inkişafına verdiyi təkanı vurğulayaraq, Prezident İlham Əliyevin rəhbərliyi altında Azərbaycanın suverenliyinin bərqərar olunması, işğaldan azad edilən torpaqlarda bərpa və quruculuq işlərinin aparılması barədə danışb.
Tədbirdə çıxış edən YAP Nəsimi rayon təşkilatının sədri Azər Süleymanov 44 günlük Vətən müharibəsində Azərbaycan gənclərinin göstərdiyi şücaət və əzmkarlıqdan bəhs edib. O, gənclərin dövlətin inkişafında mühüm rol oynadığını vurğulayıb.
Məktəb-Lisey Kompleksinin direktoru İlahə Carçıyeva bu cür maarifləndirici tədbirlərin təşkilinə görə BSU rəhbərliyinə təşəkkür edib və bu tip görüşlərin gənclərin milli dəyərlərə bağlı, savadlı və vətənpərvər şəxsiyyətlər kimi yetişməsində əhəmiyyətini qeyd edib.
