Bu gün, 2 Aprel, dünyada Dünya Autizm Məlumatlandırma Günü kimi qeyd olunur. 2007-ci ildə BMT tərəfindən təsis olunan bu günün əsas məqsədi autizm spektr pozuntusu (ASP) haqqında cəmiyyətin məlumatlandırılması və autizmli insanlara dəstəyin artırılmasıdır.
"Tehsil365" xəbər verir ki, mütəxəssislərin sözlərinə görə, autizm erkən diaqnoz və düzgün yanaşma ilə idarə oluna bilən nevroloji bir vəziyyətdir. Statistikaya əsasən, dünya üzrə hər 100 uşaqdan biri autizm spektr pozuntusu ilə dünyaya gəlir.
Bu gün münasibətilə dünyanın bir çox ölkəsində müxtəlif maarifləndirmə tədbirləri keçirilir. Bir çox dövlət qurumları, qeyri-hökumət təşkilatları və cəmiyyət fəalları autizmli şəxslərin hüquqlarının qorunması və onların sosial həyata inteqrasiyasını dəstəkləməyə çağırır.
Qeyd edək ki, Dünya Autizm Məlumatlandırma Gününün rəsmi simvolu mavi rəng hesab olunur. Bu səbəbdən bu gün bir çox bina və abidələr mavi işıqla işıqlandırılır.