Naxçıvanda Heydər Əliyev Fondu və Elm və Təhsil Nazirliyinin birgə layihəsi çərçivəsində ölkənin ümumi təhsil müəssisələrinin şagirdləri arasında may ayında “Zəkaların mübarizəsi” olimpiadası təşkil olunacaq.
“Tehsil365” xəbər verir ki, olimpiadanın regional mərhələsində Naxçıvan Muxtar Respublikasının ümumtəhsil məktəblərindən bilik yarışı və şahmat turniri istiqaməti üzrə ayrı-ayrılıqda 8 komanda olmaqla ümumilikdə 16 komanda iştirak edəcək.
Regional mərhələdə hər istiqamət üzrə uğur qazanan 1 komanda may ayında paytaxt Bakıda keçiriləcək olimpiadanın final mərhələsində Naxçıvanı təmsil edəcək.
Qeyd edək ki, aprelin 3-də Naxçıvanda şahmat, növbəti həftə isə bilik yarışı istiqamətlərində olimpiadanın regional mərhələsi təşkil olunacaq.
Olimpiadada iştirak edən IX-XI sinif şagirdləri riyaziyyat, rəqəmsal texnologiyalar, təbiət və humanitar elmlər, mədəniyyət və incəsənət sahələrində bilik və bacarıqlarını nümayiş etdirəcək, eyni zamanda şagirdlər arasında şahmat turniri təşkil ediləcək.
Komanda yarışı formatında olimpiadanın keçirilməsində əsas məqsəd müxtəlif sahələrdə bilik və bacarığı ilə seçilən istedadlı gəncləri aşkar etmək, şagirdlərdə əməkdaşlıq, effektiv ünsiyyət, liderlik keyfiyyətləri, müzakirə mədəniyyəti, qərar vermə, komanda ilə işləmə, analitik və məntiqi düşünmə, planlaşdırma və strategiya qurma bacarıqlarını inkişaf etdirmək, onlar arasında sağlam rəqabət mühitini formalaşdırmaq və region gəncləri arasında ünsiyyət mühitini genişləndirməkdir.
