Bu gün Azərbaycanda ilk sosial televiziya nümunəsi olan DOST TV-nin fəaliyyətə başlamasından bir il ötür.
“Tehsil365” xəbər verir ki, Əmək və Əhalinin Sosial Müdafiəsi Nazirliyinin internet televiziyası olaraq yayıma başlayan DOST TV, ötən il ərzində əmək, məşğulluq, sosial müdafiə və sosial təminat mövzularını əhatə edən geniş informativ proqramlarla tamaşaçıların qarşısına çıxıb.
Televiziya fəaliyyət göstərdiyi müddət ərzində sosial yenilikləri, islahatları, qanunvericilikdəki dəyişiklikləri və dövlət sosial xidmətlərini izləyicilərinə dolğun şəkildə çatdırıb. DOST TV-nin əsas xüsusiyyətlərindən biri izləyicilərlə canlı yayımda birbaşa təmasda olmaq və sosial şəbəkə istifadəçilərinin suallarını Nazirlik rəsmilərinin iştirakı ilə cavablandırmaqdır.
Televiziya, həmçinin digər dövlət qurumları, vətəndaş cəmiyyəti institutları və ekspertlərlə birgə sosial mövzular üzrə müzakirələr və təhlillər təşkil edərək fəaliyyətini genişləndirib.