Aprelin 3-də Azərbaycan Dillər Universitetində (ADU) “XX yüzillikdə Cənubi Qafqazda azərbaycanlılara qarşı həyata keçirilmiş soyqırımı və deportasiyalar” mövzusunda tədbir keçirilib.
Əvvəlcə Azərbaycan Respublikasının Dövlət Himni səsləndirilib. Qərbi Azərbaycanla bağlı hazırlanmış videoçarx izlənilib.
“Tehsil365” xəbər verir ki, tədbirdə çıxış edən ADU-nun rektoru akademik Kamal Abdulla Qərbi Azərbaycan İcmasının uğurlu fəaliyyətinə diqqət çəkib. Rektor deyib: “Bu gün Qərbi Azərbaycan ifadəsi özündə çox önəmli siyasi, elmi, mədəni, tarixi aspektləri ehtiva edir. Azərbaycan bütün dünyaya öz həqiqətlərini çatdırmaqda daha inamlı, daha güclü, daha tutarlı əsaslara malikdir. Bu inam, bu güc, bu tutarlı əsaslar bizim məsuliyyətimizi artırmış olur.
Prezident İlham Əliyev Qərbi Azərbaycanla bağlı bir çox məsələlərdə atılacaq addımları Zəfər günlərindən sonra da davam etdirməyi lazım bilir. Ali Baş Komandan kimi rəhbərimizin çox gözəl siyasi vərdişi var: heç bir problemin dondurulmasına imkan vermir. Qarabağ məsələsinin də dondurulmasına çalışan qüvvələrə bu imkanı verməməklə, bir daha böyük siyasi iradəsini göstərmiş oldu. Qərbi Azərbaycanla bağlı məsələlərdə də buna imkan verilməyəcək, tarixi ədalət öz yerini tapacaq. Biz buna inanırıq, bütün gücümüzlə çalışırıq ki, bu işə töhfə verək”.
Qərbi Azərbaycan İcmasının sədri, Milli Məclisin deputatı Əziz Ələkbərli qeyd edib ki, Qərbi Azərbaycana qayıdış böyük bir prosesdir. Qayıdış prosesini sürətləndirmək üçün hər bir azərbaycanlı fəal olmalıdır. Bu fəallıq təkcə siyasi müstəvidə deyil, təhsil, elm, mədəniyyət sahələrində də özünü göstərməlidir.
Almaniyada yaşayan yazıçı, tərcüməçi Orxan Aras tədbirə videoformatda qoşulub. O, çıxışında qeyd edib ki, ermənilərin tarix boyu türklərə, xüsusən də azərbaycanlılara qarşı amansız soyqırımı siyasəti olub. Soydaşlarımız etnik təmizləmələrə, deportasiyalara, soyqırımlarına məruz qalaraq həmin coğrafiyalardan zorla köçürüldükdən sonra o ərazilərdəki Azərbaycan izləri ermənilər tərəfindən silinib, məhv edilib.
Azərbaycan Dövlət Pedaqoji Universitetinin beynəlxalq əlaqələr üzrə prorektoru, Qərbi Azərbaycan İcması Ziyalılar Şurasının üzvü, professor Mahirə Hüseynova tədbirin önəmindən söz açıb. Qeyd olunub ki, Qərbi Azərbaycana qayıdış prosesi özünü bütün sahələrdə göstərməlidir. Azərbaycan xalqı ötən iki əsr ərzində silahlı münaqişələr, işğal, etnik təmizləmə, zorla köçürülmə və soyqırımlarından böyük əziyyət çəkmişdir. Azərbaycanlıların vaxtilə mütləq əksəriyyət təşkil etdiyi indiki Ermənistan ərazisindən tamamilə çıxarılması nəticəsində indi həmin yerlərdə ermənilər yaşayır.
Amasiya rayon Qərbi Azərbaycan İcmasının sədri, akademik Abel Məhərrəmov gənclərə üzünü tutaraq tarixi həqiqətləri daha dərindən öyrənməyin vacibliyindən danışıb. O bildirib ki, Qərbi Azərbaycan haqqında xarici dillərdə məqalələrin, araşdırma yazılarının aparılması olduqca zəruri məsələlərdən biridir.
Qərbi Azərbaycan İcması Qadınlar Şurasının sədri, Milli Məclisin deputatı Məlahət İbrahimqızı qeyd edib ki, Qərbi Azərbaycan həqiqətlərinin öyrənilməsi gənclər üçün yeni tarixi faktlarla tanışlıq baxımından çox önəmlidir.
Milli Məclisin deputatı Hikmət Babaoğlu çıxışında Qərbi Azərbaycana qayıdışla bağlı görülən işlərin önəmindən söz açıb. Bildirib ki, qayıdış prosesi öz prinsiplərini açıq şəkildə bəyan etməklə, tarixi ədalətin gec-tez bərqərar olacağını təqdim etmiş olur.
ADU-nun Təhsil fakültəsinin dekanı professor Hikmət Əlizadə Qərbi Azərbaycanın dünəni, bu günü və sabahı ilə bağlı danışıb. Qeyd olunub ki, tarixi Azərbaycan torpaqları olan Qərbi Azərbaycan hər zaman öz abidələri, memarlığı ilə seçilib.
Tədbir tələbələrin hazırladığı bədii hissə ilə davam edib.
