Prezident İlham Əliyevin “Azərbaycan Milli Elmlər Akademiyasının 80 illiyinin qeyd edilməsi haqqında” 2025-ci il 18 mart tarixli Sərəncamının elmi müəssisələrin qarşısında qoyduğu vəzifələrin icrası üzrə görülən işlər çərçivəsində AMEA-nın Gəncə bölməsində “Nizami Gəncəvi yubileyləri: Ulu Öndər Heydər Əliyevdən möhtərəm Prezidentimiz İlham Əliyevə” adlı monoqrafiya çapa hazırlanır.
AMEA-dan “Tehsil365”-ə bildirilib ki, layihənin rəhbəri AMEA-nın Gəncə bölməsinin sədri akademik Fuad Əliyevdir. Bu elm ocağında keçirilən seminarda kitabın fəsillərində əhatə edilmiş mövzular və onların elmi əhəmiyyəti müzakirə edilib.
Monoqrafiyanın müəllifi, AMEA-nın Gəncə bölməsinin elmi işlər üzrə sədr müavini filologiya üzrə fəlsəfə doktoru Əlimuxtar Muxtarov kitabın yazılmasının elmi zərurəti haqqında danışıb. O, dahi mütəfəkkir Nizami Gəncəvi ilə bağlı əlamətdar tarixlərin qeyd olunmasının əsrləri əhatə edən salnaməsinin sistemləşdirilməsinin və bu mövzunun hər bir dövrün xüsusiyyətlərini nəzərə alaraq elmi şərhinin vacibliyini qeyd edib.
Məruzəçi kitabın ilkin variantda “Əsrlərdən gələn Nizami Gəncəvi sədası”, “1941-ci ilin payızında mühasirəli Leninqradda yaşanan 800 yaşlı Nizami Gəncəvi təntənəsi”, “Nizami Gəncəvi elə bir dahi sənətkardır ki, onun yubileyi hər il qeyd edilməlidir”, “Müstəqil Azərbaycanın İlham Əliyev erası”, “Azərbaycan nizamişünaslığının İlham Əliyevlə başlayan inkişaf mərhələləri”, “Azərbaycandan müasir dünyaya Nizami Gəncəvi çağırışı” adlı fəsilləri əhatə etdiyini bildirib.
Sonra seminarın iştirakçıları onları maraqlandıran məsələlər haqqında fikirlərini bildiriblər.
Tədbiri yekunlaşdıran bölmənin sədri akademik Fuad Əliyev kitabda Nizami Gəncəvinin ən son yubiley tədbirləri ilə bağlı, xüsusən Gəncədə aparılan işlərin tarixi miqyasının, eləcə də Nizami Gəncəvi Beynəlxalq Mərkəzinin fəaliyyətinin daha dolğun əks olunmasının vacibliyini qeyd edib.
