UFAZ-ın tələbəsi Hakim Əliyev “Apple” şirkətinin “Swift Student Challenge 2025” müsabiqəsinin qaliblərindən biri seçilib.
“Tehsil365” xəbər verir ki, Hakim Əliyevin layihəsi olan “Cipher Master” oyunçulara klassik şifrələmə üsullarını – Sezar, Atbaş, Vijener və Morze kodlarını maraqlı bir süjet xətti vasitəsilə öyrədən maarifləndirici oyundur. Oyunun məqsədi şifrələri açaraq Ümumdünya Tərtibatçılar Konfransını (WWDC) xilas etmək və Stiv Cobsun köməkçisinə yardım göstərməkdir.
“Swift Student Challenge” hər il “Apple” tərəfindən keçirilən və proqramlaşdırma sahəsindəki yaradıcılıq və texniki bacarıqları ön plana çıxaran müsabiqədir. Dünyanın müxtəlif ölkələrindən minlərlə tələbə “Swift Playgrounds” ilə hazırlanmış layihələrini təqdim edir və “Apple” onların arasından 350 qalib seçir. Qiymətləndirmə zamanı layihələrin orijinallığı, texniki icrası və istifadəçi təcrübəsi nəzərə alınır.
Müsabiqənin şərtləri “Swift Playgrounds” platformasında interaktiv bir tətbiq hazırlamaq, 3 dəqiqə ərzində layihə çərçivəsində bütün prosesin təqdimatı, layihənin ideya və texniki xüsusiyyətlərini izah edən yazılı hesabatın hazırlanmasından ibarətdir.
Yarışda qalib gələn Hakim Əliyev “Apple”ın rəsmi sertifikatı, “Apple Developer Program”da bir illik üzvlük, "App Development with Swift" sertifikat imtahanı üçün ödənişsiz kupon, “AirPods Max” qulaqlığı və 9 iyun tarixində “Apple Park”da keçiriləcək eksklüziv tədbirə müraciət imkanı əldə edib.