“Biz əminik ki, Qərbi Azərbaycana qayıdacağıq. Bizim düşmənlərimiz hələ də var, onların hələ də torpaqlarımızda gözləri var, çünki bizim torpaqlarımız qiymətlidir, gözəldir. Təbii sərvətlərimiz var, bunları qorumaq üçün güclü və bilikli olmaq lazımdır”.
“Tehsil365” xəbər verir ki, bunu “Sumqayıtlı gənc elçilər: Qərbi Azərbaycana qayıdış” mövzusunda keçirilən konfransda elm və təhsil nazirinin müavini Firudin Qurbanov bildirib.
Onun sözlərinə görə, 20-ci əsrdə azərbaycanlılar Qərbi Azərbaycandan 4 dəfə deportasiya olunublar. Ən sonuncu deportasiya 20-ci əsrin sonunda olub ki, həmin zaman da 300 mindən çox azərbaycanlı öz torpağından qovulub, 216 nəfər qətlə yetirilib: “SSRİ dağıldıqda isə ermənilər yaranmış vəziyyətdən istifadə edərək torpaqlarımızı zəbt ediblər. Ölkədə 1 milyondan çox qaçqın və məcburi köçkün ordusu yarandı. Onların vaxtından tez ağaran saçları, üzlərindəki kədər hələ də qalıb. Çadır şəhərciklərində 100 mindən çox azərbaycanlı məskunlaşmışdı. Amma bunların hamısına dözmüşük! Ulu Öndər Heydər Əliyev hər dəfə çadır şəhərçiyində köçkünlərlə görüşəndə onda necə hisslər yaranırdı! Amma nikbin idi. Ölkə rəhbərinin uzaqgörən siyasəti, güclü ordumuz sayəsində torpaqlarımızı azad etdik. Bu gün köçkünlər torpaqlarımna qayıdırlar. Amma bizim əsas arzumuz Qərbi Azərbaycana qayıtmaqdır”.
Nazir müavini əlavə edib ki, 2021-ci ildə Qərbi Azərbaycan İcmasının yaradılması böyük nailiyyət idi. Bu icma qısa müddətdə böyük işlərə imza atdı: “Dünya ölkələrinə bu icma vasitəsilə mesajlar verildi ki, tarixi torpaqlarımızda min illərlə soydaşlarımız yaşayıblar. Ermənilər oradakı abidlərimiz, məzar daşlarına zərər vurublar”.
F.Qurbanov nəzərə çatdırıb ki, tədris prosesində təhsilalanlara Qərbi Azərbaycan haqqında məlumatlar çatdırılır. Bununla yanaşı, Qərbi Azərbaycan mövzusunda tədbirlər, olimpiada keçirilir: “Biz tariximizi, mədəniyyətimizi bilməliyik. Vətənpərvər olmaq üçün həm də bunları bilmək lazımdır”.