Mövcud hava şəraiti nəzərə alınmaqla soyuq günlərdə "Azəristiliktəchizat" ASC-nin balansında olan qazanxanalar və istilik məntəqələri işləyəcək.
“Tehsil365” xəbər verir ki, bu barədə "Azəristiliktəchizat" ASC-nin mətbuat katibi Elvin Basqallı məlumat verib.
Onun sözlərinə görə, istilik təminatı daha bir neçə gün davam edəcək.
Mövcud qanunvericiliyə əsasən, bu gündən "Azəristiliktəchizat" ASC həm Bakıda, həm də regionlarda istilik təchizatını dayandırmalı idi.
Qeyd edək ki, respublika üzrə "Azəristiliktəchizat" ASC-nin balansında 557 qazanxana və 88 istilik məntəqəsi fəaliyyət göstərib. Mövsüm ərzində 3 871 yaşayış binası, 185 mindən çox mənzil, yüzlərlə məktəb, bağça və səhiyyə müəssisəsi, eləcə də 2 mindən artıq sosial və təsərrüfat obyekti istiliklə təmin olunub.