Ümummilli Lider Heydər Əliyevin ad günü münasibətilə 1-25 aprel 2025-ci il tarixlərində esse müsabiqəsi keçiriləcək.
"Tehsil365" xəbər verir ki, müsabiqənin əsas məqsədi iştirakçıların yaradıcı düşünmə bacarıqlarını inkişaf etdirmək, yazılı nitq qabiliyyətlərini artırmaq və fikirlərini səlis ifadə etmələrinə şərait yaratmaqdır.
Müsabiqə Azərbaycanın bütün universitetlərində təhsil alan həssas kateqoriyaya aid tələbələr üçün nəzərdə tutulub. İştirakçılar aşağıdakı mövzulardan birini seçərək esse təqdim etməlidirlər:
Heydər Əliyevin təhsil siyasətində əlilliyi olan gənclərə yönəlik inklüziv təhsil proqramlarının yaradılması
Heydər Əliyevin əmək siyasəti və əlilliyi olan gənclərin məşğulluğu
Əlilliyi olan gənclər üçün əlçatan mühit
Əlilliyi olan insanların həyat keyfiyyətini artırmaq üçün innovasiyalar
Əlilliyi olan gənclər üçün ağıllı texnologiyaların yaradılması və onların gündəlik həyata təsiri
Məqalələr Times New Roman şriftində, 12 ölçüdə, maksimum 2000 söz həcmində yazılmalı və yazının əvvəlində iştirakçının adı, soyadı, universiteti, fakültəsi, kursu və ixtisası göstərilməlidir. Məqalənin sonunda ədəbiyyat siyahısı qeyd olunmalıdır.
Qiymətləndirmə 5 meyar üzrə aparılacaq: mövzuya uyğunluq, düşüncə, dil və üslub, orijinallıq və yaradıcı yanaşma, qrammatika və yazı qaydalarına riayət. Hər bir meyar üzrə maksimum 20 bal olmaqla, ümumi nəticə müəyyən olunacaq.
Ən yüksək bal toplayan iştirakçılar qalib elan ediləcək. I yer (95-100 bal) – 1 nəfər, II yer (90-94 bal) – 2 nəfər, III yer (85-89 bal) – 3 nəfər olmaqla ümumilikdə 6 qalib seçiləcək və onlar müvafiq olaraq 500, 300 və 200 manat pul mükafatı ilə təltif olunacaqlar.
Məqalələrin son göndərilmə tarixi 25 aprel 2025-ci ildir. Yazılar aşağıdakı e-poçt ünvanına göndərilməlidir:
[email protected]
Əlavə məlumat üçün əlaqə nömrəsi: +99451-910-76-62